Táýelsizdik saraıynda balalar men jastardy damytý ortalyǵy ashyldy
«Búgin Táýelsizlik saraıyn damytýdyń jańa tujyrymdamasyn tanystyrýdamyz. Pandemııa kezinde kóptegen kásiporyndar men mádenıet nysandary óziniń tıimsiz ekendigin kórsetti. Táýelsizdik saraıynyń burynǵy tujyrymdamasy aýqymdy halyqaralyq jáne kópshilikke arnalǵan mádenı is-sharalardan turdy. Degenmen karantın talaptaryna baılanysty atalǵan tujyrymda óz mańyzdylyǵyn joǵaltty. Osy oraıda bıýdjet qarjysynan kúneltip otyrǵan aýmaǵy 38 myń sharshy metr bolatyn bul nysannyń qyzmetin qaıta qaraý kerek boldy. Búgin kommýnaldyq menshikti qalaı tıimdi basqarý kerektigin kórsetetin bolamyz. Biz bıýdjet shyǵynyn azaıtyp, nysannyń kommertsııalyq múmkindigin arttyrdyq. Sonymen qatar Táýelsizdik saraıynyń áleýmettik-mádenı mańyzdylyǵyn da esten shyǵarmaımyz», - dedi Astana Venue Management JShS-nyń bas dırektory Málik Hasenov.
Táýelsizdik saraıynyń jańa tujyrymdamasyna sáıkes balalar men jastardyń shyǵarmashylyq jáne sport áleýetin arttyrý maqsatynda munda úıirmeler men túrli sektsııalar ashyldy. Úıirmelerge kúndelikti 2 myńǵa jýyq bala qatysady.
Sondaı-aq, Táýelsizdik saraıynda kórkem gımnastıka ortalyǵy, para bıden haroegrafııa ortalyǵy, Dınara Sádýaqasovanyń shahmat akademııasy, U-Study testileý ortalyǵy, «Altyn dombyra» dombyra úırený mektebi, elorda fılarmonııasynyń sımfonıka jáne hor orkestri, «Kınokıo» kınomatografııa óner mektebi, eresekter men balalarǵa arnalǵan ústel tennısi sektsııasy, «Ortus» dzıýdo sektsııasy jáne ataqty ánshi Ámire atyndaǵy vokal mektebi iske qosyldy.
«Táýelsizdik saraıyn jalǵa alý sharshy metri 2 myń teńge turady. Sondyqtan da balalardyń esebinen mol qarjy tabý maqsaty joq. Bizdiń maqsat – nysandy shyǵynyn qysqartý arqyly jumys istetý. Úıirmeler men sektsııalarǵa balalardy irikteýdiń 50 paıyzy tegin túrde júzege asyrylsa, qalǵan 50 paıyzy básekege saı baǵamen júrgiziledi. Bylaı alyp qarasaq ǵımaratty jalǵa alý baǵasy basqa nysandarǵa qaraǵanda 2,5 esege tómen. Bul óz kezeginde óner men shyǵarmashylyq baǵytyndaǵy shaǵyn jáne orta kásipkerlikti qoldaý bolyp tabylady», - dedi M. Hasenov.