Táýelsizdik merekesine oraı batysqazaqstandyqtar memlekettik nagradalar aldy
Táýelsizdik merekesimen jınalǵandardy oblys ákimi Ǵalı Esqalıev quttyqtap, osynaý ýaqyt ishinde Qazaqstannyń damyǵan ındýstrııalyq-ınnovatsııalyq elge aınalǵanyn atap ótti.
«Egemendik alǵannan bastap qabyldanǵan barlyq saıası jáne ekonomıkalyq sheshimder eldiń damýyna ólsheýsiz kómegin tıgizdi. Aýyl sharýashylyǵyna ınvestıtsııa, saýda-sattyq, densaýlyq pen bilim, jastar máselesine erekshe kóńil bólinip, bul baǵytta kóptegen ister júzege asty. Elimizdiń eksporttyq áleýeti artyp, ekonomıkasy órkendedi. Memleket halyqaralyq sharalardyń arqasynda oblysqa qolaıly ınvestıtsııa saldy. Jıyrma toǵyz jyldyń ishinde ishinde óńir ekonomıkasyna 4,9 trln teńge ınvestıtsııa quıyldy. Toqsanynshy jyldardaǵy toqyraýda qurylys túgili, qarapaıym jalaqy men zeınetaqy berý basty másele boldy. Al bıyl óńirde qurylys jumystarynyń kólemi birneshe ese artyp, 175 mıllıard teńgeni qurap otyr. Bul da egemendiktiń jarqyn kórinisiniń biri», dedi óńir basshysy.
Jıyn barysynda Ǵ.Esqalıev QR Prezıdentiniń Jarlyǵymen marapattalǵan batysqazaqstandyqtarǵa memlekettik nagradalaryn tapsyrdy. «Qurmet» ordeni Ǵ.Qurmanǵalıev atyndaǵy Batys Qazaqstan oblystyq fılarmonııasynyń ánshisi Sáýle Taýdaeva, Jánibek aýdany «Álem» ShQ basshysy Eskendir Elemesov jáne basqalarǵa berilse, Bókeı ordasy aýdanyndaǵy «Kóshen» ShQ mehanızatory Nurjan Ǵabbasov, Báıterek aýdanyndaǵy «Dostyq» ShQ mehanızatory Nıkolaı Kondrashov, Qaratóbe aýdanyndaǵy «Móldir» ShQ malshysy Turar Seıtqalıev, «Jaıyqjylýqýat» AQ oqshaýlaýshysy Orynǵalı Orazǵalıev úshinshi dárejeli «Eńbek dańqy» ordenimen marapattaldy. Sondaı-aq bir top adamǵa «Eren eńbegi úshin», «Shapaǵat» medaldary, Qazaqstan Respýblıkasynyń Qurmet gramotalary tapsyryldy.
Saltanatty is-shara «Táýelsizdik – tuǵyrym» atty kontserttik baǵdarlamamen jalǵasyn tapty.