Táýelsizdik merekesi kúnderi jyldyń úzdik qolóner sheberleri marapattalady
Onyń aıasynda elimizdiń úzdik qolóner sheberleri jasaǵan buıymdardyń jármeńkesi uıymdastyrylady, dep xabarlaıdy «QazAqparat» HAA tilshisi.
Festıval barysynda "Sheber - 2016" atty respýblıkalyq baıqaýdyń jeńimpazdary marapattalady. Budan bólek, ulttyq dızaınerlerdiń kıim toptamalarynyń kórsetilimi, tegin sheberlik saǵattar jáne taǵy basqa mádenı sharalar ótetin bolady. "Búginde elimizdiń árbir aımaǵynda 100-200 myqty degen qolóner sheberi bar. Olar barlyq sharalarǵa belsene qatysyp keledi. Al "Sheber-Kerýeni" biz úshin mańyzdy sharalardyń biri. Sebebi ol jerde ulttyq qolóner salasyndaǵy jumystyń qorytyndysy jasalyp, úzdik dep tanylǵan sheberler marapattalady. Sondaı-aq ózara tájirıbe almasyp, kim qandaı jetistikke jetkenin kórýge múmkindik bar", - dedi Qazaqstan qolóner sheberleri odaǵynyń tóraıymy Aıjan Bekqulova búgin Astanada ótken baspasóz máslıxatynda.
Odaq basshysynyń aıtýynsha, búginde qolóner salasynda qazaqstandyq sheberlerge qyrǵyz, ózbek, tipti qytaı sheberlerimen básekege túsýge týra keli otyr. Sondyqtan uıym basshylyǵy qolóner buıymdarynyń sapasyna basa nazar aýdarý qajet dep sanaıdy. "Men Qazaqstanǵa syrttan keletin qolóner buıymdary sapaly dep aıta almaımyn. Sol sebepti qazaqstandyq sheberler osy salany tolyǵymen ózderine qarata alady", - deıdi A.Bekqulova.