Táýelsizdik qurdasy: Sardardyń memlekettik tildi bilýi óte mańyzdy
Óziniń aıtýynsha, Artem Iosıfovıch 1991 jyly 24 qyrkúıekte Petropavl qalasynda dúnıege kelgen.
Osynda erjetip, mektep bitirgen. Ata-anasy áli kúnge deıin sol qalada turady. Artem áskerı áýletten emes, ıaǵnı ata-anasynyń onyń mamandyǵyna esh qatysy joq.
7 synypqa deıin ozat oqýshy bolǵan. Mektep baǵdarlamasy qıyndaı bastaǵan sátten «tórt» degen baǵalar aralasa bastaǵan.
14 jasynan ata-anasyna kómektesip, qurylysta jumys istedi.
Joǵary synyptarda áskerı qarý-jaraqtarǵa, osy salaǵa qyzyǵa bastady.
Mektepti támamdaǵannan keıin birden Ulttyq ulannyń Petropavldaǵy áskerı ınstıtýtyna oqýǵa tústi.
Osy kezde kazarmalyq jaǵdaı, qatań áskerı tártipke boı úıretip, taktıkalyq sabaq, saptyq daıyndyq, teorııalyq pánder men emtıhan tapsyrý syndy synaqtardan óte bildi.
-Áskerge deıin mende er jigitke tán minez, rýhtyń myqtylyǵy sııaqty qasıetter boldy dep aıta almaımyn. Munyń bárine ásker nemese áskerı oqý ornynda daǵdylanady ekensiń. Shydaı almaǵandar ketedi. Mysaly, bizdiń kýrsta basynda 147 jas boldy, sonyń 113-i ǵana dıplom aldy, - deıdi Artem Rýdnıtskıı.
Onyń paıymdaýynsha, ofıtser eń aldymen óz Otanyn súıýi qajet. Sosyn qıyndyqtardan taısalmaı, qandaı ma jaǵdaı bolmasyn, dúrbeleńge boı aldyrmaı, durys sheshim qabyldaı bilýi jáne ol úshin jaýap berýden qoryqpaýy tıis.
Áskerı oqý ornyn bitirgennen keıin Artem leıtenant shenin alyp, Oraldaǵy 5517-áskerı bólimine, avtomobıl vzvodynyń komandıri laýazymyna taǵaıyndaldy. Al 2014 jyly Atyraý qalasyndaǵy 5546-áskerı bólimine aýystyryldy. Mine, ol osy kezde qazaq tilinde sóıleı bastaǵanyn qazir maqtanyshpen eske túsiredi.
«Meniń anam orys, ákem polıak. Bastapqyda memlekettik tildi bilmeıtin edim. Atyraýda barlyq polkta tek eki adam ǵana ózge ult ókilinen boldy, sondyqtan tildi úırenýge týra keldi. Oqýlyqtar men sózdikterdi paıdalanbaı-aq, maǵan sarbazdarmen, ofıtserlermen jáne serjanttarmen kúndelikti ózara qarym-qatynas kezinde qazaq tilinde sóılesý jetkilikti boldy. Osylaısha bir jyldan keıin memlekettik tilde erkin sóılep kettim. Munyń jaýyngerlermen til tabysý úshin asa mańyzdy ekendigin túsindim», dedi A.Rýdnıtskıı.
2016 jyly kapıtan Artem Rýdnıtskııdi 5517-áskerı bólimine batalon komandıriniń tehnıka jáne qarý-jaraq jónindegi orynbasary laýazymyna taǵaıyndaý týraly buıryq shyqty. Búginde osy qyzmetin abyroımen atqaryp keledi.
«Biz, Táýelsizdik qurdastary, egemen elimizben birge qaz basyp, eseıip kelemiz. Alynbaǵan asý áli kóp. Sonyń ishinde óskeleń urpaq sanasynda patrıotızm men Otanǵa degen súıispenshilik sezimin ornyqtyrý asa mańyzdy dep esepteımin», dep túıindedi oıyn A.Rýdnıtskıı.
Eske sala keteıik, budan buryn tarıhshy azattyq úshin alysqan ata-babalarymyzdyń esimin umytpaý paryz dep aıtqan edi.
Sondaı-aq, Ulttyq ulan jaýyngerleri Táýelsizdik týyn bıik ustaıtynyn jazǵan bolatynbyz.