Táýelsizdik kúnine tartý: Balalar Qarlytaý shyńyn baǵyndyrady
15:41, 10 Jeltoqsan 2018
ALMATY. QazAqparat - Almaty áskerı-patrıottyq klýbynyń músheleri Qazaqstannyń kók baıraǵyn Qarlytaý shyńyna ornatpaq, dep habarlaıdy QazAqparat tilshisi.
Balalar Alataýdyń bıik shyńdarynyń birin Qazaqstan Respýblıkasynyń Táýelsizdigi merekesi qarsańynda baǵyndyrýdy josparlap otyr.
Osylaısha, Almaty áskerı-patrıottyq klýb músheleri merekege tartý jasamaq. Taý shyńyna 3 jyldan beri alpınızmmen aınalysatyn balalar shyǵady.
Búginge deıin jasóspirimder bıiktigi 3-4 myń metr jáne odan joǵary bolatyn Panfılov, Abaı, Molodejnyı, Sovetov, Komsomol, Fýrmanov pen Panorama shyńdaryn baǵyndyryp úlgergen. Qarlytaý shyńy Іle Alataýynda ornalasqan. Bıiktigi - 4170 metr.