Táýelsizdik kúnine oraı Qaraǵandy oblysynda birneshe nysan ashylady

QARAǴANDY. QazAqparat - Qaraǵandy oblysynda Táýelsizdik kúnin toılaý tek saltanatty sharalar jáne kontserttermen ǵana shektelmeıdi, dep habarlaıdy óńir basshysynyń resmı saıty. 

Mereke kúni qaıyrymdylyq aktsııalary uıymdastyrylyp, syılyqtar tabys etiledi. Sondaı-aq jańa áleýmettik jáne ónerkásiptik nysandar ashylady dep josparlanýda. 

«Táýelsizdik kúnine oraı oblysta 200-ge tarta sharalar josparlanǵan. Ol - taqyryptyq kórmeler, baıqaýlar, patrıotızm sabaqtary, fleshmobtar, forýmdar men kontsertter, ǵylymı-tájirıbelik konferentsııalar, sporttyq saıystar jáne t.b. Erekshe nazar turmystyq jaǵdaıy tómen azamattarǵa bólinedi: oblys boıynsha shamamen 20 qaıyrymdylyq aktsııasy ótip, onda 28 myń adam qamtylady. Bir rettik materıaldyq kómek kórsetilip, azyq-túlik jıyntyqtary tabys etiledi», - dep málimdedi Іshki saıasat basqarmasynyń jetekshisi Nurlan Rystın apparattyq jınalys barysynda. 

Onyń aıtýynsha, mereke qarsańynda óńirde 12 jańa áleýmettik jáne ónerkásiptik nysandar ashylady dep josparlanýda. Olardyń qatarynda: Qaraǵandy jáne Temirtaý qalalarynda eki balabaqsha; Jezqazǵanda tómendetilgen baǵaman taýar satatyn «Uly dala» sýpermarketi; Abaı aýdanynda tigin tsehy; Nura aýdanynda bıznes-ortalyq jáne qonaq úı jáne t.b. nysandardyń ashylýy. Qarajalda jáne Osakarov aýdanynda Táýelsizdik stelalary paıda bolady. 

Qaraǵandy, Balqash, Jezqazǵan qalalarynda jáne Ulytaý aýdanynda jańa páterlerdiń kiltteri tabys etiledi.

Aıta ketken jón, oblys ortalyǵynda Kenshiler mádenıet úıinde 14 jeltoqsanda Táýelsizdik kúnine arnalǵan saltanatty jıyn ótedi. Shara barysynda memlekettik nagradalar tabys etiledi. Merekege oraı «Qaraǵandy oblysynyń Qurmetti azamaty» ataǵynyń jańa ıegerlerine qurmet kórsetiledi.