Táýelsizdik kúnine arnalǵan chellendjdi Qaraǵandy oblysynyń qalalary qoldady

QARAǴANDY. QazAqparat – Qaraǵandy oblysynyń qalalary «Meniń týym. Meniń Otanym!» chellendjine ún qosýda. Óńir turǵyndary balkondaryna elimizdiń Týyn ilip, patrıottyq sezimin bildirýde, dep habarlaıdy QazAqparat tilshisi.

«Meniń týym. Meniń Otanym!» chellendjine 16 jeltoqsan kúni saǵat 10.00 de Qaraǵandy qalasy bastaý berdi. Qaraǵandy qalasynda «Qaraǵandy» qonaq úıiniń balkonyna 20-ǵa jýyq Tý ilinip, jastar jalaýshalardy alyp ataýly chellendjdi Balqash qalasyna joldady. Estafetany Balqash qalasymen qosa, Jezqazǵan, Sátbaev, Saran, Shahtınsk qalalary da jalǵastyrady.

Qaraǵandy qalasy ákimdiginiń aıtýynsha, kenshiler shaharynda syrtqy bezendirý jumystary boıynsha 35 banner, 20 kerme, 200 jalaýshalar jáne barlyq saýda ortalyqtarynda 10-ǵa jýyq Tý ornatylǵan.

Sonymen qatar, «Tabysqa bastaıtyn jol» onlaın-chellendji, «Meniń týǵan ólkem. Órkendeý men tabys serpini» onlaın marafony, óńirlerdiń damýyn qysqasha baıandaıtyn beınerolıkter, fotoesepter jarııalanýda. Oblysqa Táýelsizdikti qurýǵa eleýli úles qosqan kórneki qazaqstandyqtardyń, eńbek ardagerleriniń, jastardyń beınequttyqtaýlary áleýmettik jelilerde, LED-ekrandarda ornalastyrylýda.