Táýelsizdik kúni: Shyǵystyń zııatker jas býyny ózara myqtyny anyqtady

ASTANA. QazAqparat - Óskemen qalasynda Táýelsizdik kúnin toılaý aıasynda belsendiler men kóshbasshylardyń «Máńgilik el - bolashaqqa umtylǵan el» aımaqtyq baıqaýy máresine jetti, dep habarlaıdy QazAqparat tilshisi.

Shyǵys Qazaqstan oblysynyń Aımaqtyq kommýnıkatsııalar qyzmetinen habarlanǵandaı, jyl saıyn Táýelsizdik kúnin merekeleý qarsańynda oblystyń zııatkerleri men entýzıastarynyń arasynda «Máńgilik el - bolashaqqa umtylǵan el» atty belsendiler men kóshbasshylardyń aımaqtyq baıqaýyn ótkizý dástúrge aınalǵan.

Baıqaý turaqtylyqty, táýelsizdikti, memleketimizdiń qaýipsizdigin saqtaý áreketine belsendi jáne batyl, basqa mádenıet ókilderimen konstrýktıvti dıalog qura biletin joǵary deńgeıdegi ózindik ulttyq sana-sezimi, ulttyq, patrıottyq rýhy bar, tarıhı jady jáne áleýmettik jaýapkershiligi mol óskeleń urpaqty - qoǵamnyń áleýetti belsendi múshelerin tárbıeleý maqsatynda ótkiziledi.
 

Oblystyń ár aýdany qarasha boıy balalar arasynda «Týǵan ólke - bizdiń bastamalarymyzdyń negizi» áleýmettik aktsııasyn ótkizdi. Áleýmettik aktsııa «Rýhanı jańǵyrý» baǵdarlamasynyń qundylyq baǵdarlaryna sáıkes jáne ólketaný məselelerin anyqtaýǵa, oqyp úırenýge jáne qalanyń (aýdan, eldimekenniń, áleýmettik toptyń) máseleleriniń birin baıqaý qatysýshylarynyń kúshimen ázirlep sheshýge baǵyttalǵan.
 

D. Serikbaev atyndaǵy Shyǵys Qazaqstan memlekettik tehnıkalyq ýnıversıteti men Krýpskaıa atyndaǵy negizgi orta mektep-ınternat bazasynda Shyǵys Qazaqstannyń barlyq qalalary men aýdandarynan kelgen 200 astam kóshbasshy men belsendi konkýrstyń kelesi kezeńine ótken. Vıktorına aıasynda qatysýshylar tarıh, geografııa, ádebıet jáne Qazaqstan mádenıeti pánderinen óz bilimderin kórsetti.

Eń baıytylǵan jáne qyzyqty bolyp «Básekege qabiletti, syndarly, myqty, shyǵarmashyl HHІ ǵasyr Tulǵasy» dıalogtik alańy ótti. Qatysýshylar úshin talqylanyp jatqan problemaǵa óz kózqarasyn bildirýge jáne keıin ózderiniń tıimdi sheshý joldaryn usynýǵa múmkindik berildi.
 

3 aınalymnyń nátıjesi boıynsha qatysýshy-komandalar dıplomdarmen jáne baǵaly syılyqtarmen marapattaldy:

Bas júldeni Rıdder aýdanynyń komandasy ıelendi.

І dárejeli dıplommen marapattalǵandar:

- Óskemen qalasy, daryndy balalarǵa arnalǵan Jambyl atyndaǵy oblystyq mamandandyrylǵan mektep-gımnazııa-ınternaty;

- Óskemen qalasy, oblystyq matematıka, fızıka, ınformatıka salasyndaǵy daryndy balalarǵa arnalǵan mektep-lıtseıi;

- Zyrıan aýdany.

ІІ dárejeli dıplommen marapattalǵandar:

- Shákárim atyndaǵy úsh tilde oqytatyn kóp beıindi gımnazııasy;

- Óskemen qalasy, hımııa-bıologııa baǵytyndaǵy Nazarbaev Zııatkerlik mektebi;

- Shemonaıha aýdany;

- Óskemen qalasy, oblystyq mamandandyrylǵan IT mektep-lıtseıiniń komandalary.

ІІІ dárejeli dıplommen marapattalǵandar:

- Katonqaraǵaı aýdany;

- Semeı qalasy;

- Glýbokoe aýdany;

- Jarma aýdany.

Jyl saıynǵy konkýrsqa  «Ne? Qaıda? Qashan?» formatyndaǵy «Óz jerińdi tanyp bil» ıntellektýaldyq oıyny óz jańashyldyǵyn engizdi.  Qatysýshy-bilgirler «mıǵa shabýyl» ádisin qoldanyp, qoıylǵan suraqtarǵa bir mınýt ishinde durys jaýap izdedi.   

Oıynnyń birinshi aınalymynyń nátıjesi boıynsha Abaı aýdanynyń komandasy jaqsy nátıje kórsetip, ІІ dárejeli dıplomdy ıelenip, estelik syılyqtarmen marapattaldy. Eń joǵary ball jınaǵan Óskemen qalasy, oblystyq matematıka, fızıka, ınformatıka salasyndaǵy daryndy balalarǵa arnalǵan mektep-lıtseıiniń bilgirler komandasy ekinshi aınalymda kórermenderge qarsy oıyn kórsetip , «Óz jerińdi tanyp bil» ıntellektýaldy oıynynyń absolıýtti jeńimpazy atandy. Chempıondarǵa marapat retinde aýyspaly «Dana úki» bilim sımvoly berilip, ár oıynshy baǵaly syılyqtarmen marapattaldy.