Táýelsizdik kúni: Shyǵysqazaqstandyqtar memlekettik nagradalarmen marapattaldy

ÓSKEMEN. QazAqparat – Shyǵys Qazaqstan oblysynyń ákimi Danıal Ahmetov mádenıet, ǵylym, bilim, densaýlyq saqtaý salalarynyń úzdikterine memlekettik nagradalardy tabys etti, dep habarlaıdy QazAqparat tilshisi.

Aımaq basshysy Danıal Ahmetov jerlesterin Táýelsizdik kúni merekesimen quttyqtap, elimizdiń damýy men órkendeýine erekshe úles qosqan shyǵysqazaqstandyqtarǵa alǵys bildirdi.

«Qurmetti jerlester! Barshańyzdy qasterli mereke – Táýelsizdik kúnimen shyn júrekten quttyqtaımyn! Osy aıtýly kúnde eren eńbekterińiz ben elimizdiń damýyna qosqan úlesterińiz úshin joǵary memlekettik nagradalardy tabystaýǵa ruqsat etińizder. Men úshin el Prezıdenti Qasym-Jomart Toqaevtyń atynan sizderdi marapattaý úlken qurmet», - dedi ol.

Oblys ákimi 37 shyǵysqazaqstandyqqa saltanatty túrde memlekettik nagradalardy tapsyrdy. II dárejeli «Dostyq» ordenimen Glýbokoe aýdanyndaǵy «Semena Maslıchnyh» ShQ basshysy Lıýdmıla Tsybenko marapattaldy. Ol oblystaǵy iri sharýa qojalyqtaryn basqaryp, kúnbaǵys jáne dándi daqyldardyń biregeı tuqymdaryn ósirýmen aınalysady. Aýdan turǵyndaryn jumyspen qamtamasyz etip, óńirdiń qoǵamdyq ómirine belsene qatysyp keledi.

«Ulyq mereke qarsańynda osyndaı joǵary qurmetke ıe bolý men úshin úlken qýanysh! Eń aldymen tatýlyǵy jarasqan memlekette ómir súrip jatqanymyz úshin Elbasy Nursultan Nazarbaevqa, Memleket basshysy Qasym-Jomart Toqaevqa alǵys bildiremin. Barlyq qazaqstandyqtardy Táýelsizdik kúnimen quttyqtaımyn!» – dedi L. Tsybenko.

Sonymen qatar «Qurmet» ordenimen Ilıa Elfımov, Jaıyq Jumahanov, Qaırat Qojahmetov, Ýmýd Efendıev marapattaldy. III dárejeli «Eńbek Dańqy» ordeni, «Eren eńbegi úshin», «Shapaǵat» medaldary ár salada jemisti eńbek etip júrgen azamattarǵa berildi. Taǵy 13 adam QR Prezıdenti Qasym-Jomart Toqaevtyń Qurmet gramotasymen madaqtaldy.