Táýelsizdik kúni qarsańynda Nur-Sultan ákimdiginde memlekettik nagradalar tapsyryldy

NUR-SULTAN. QazAqparat - Nur-Sultan qalasynyń ákimi Altaı Kólginov Memleket basshysynyń Jarlyǵyna sáıkes, Arys qalasyn qalpyna keltirý jumystaryna qatysqan densaýlyq saqtaý, bilim, kólik, qurylys salasyndaǵy azamattardy, qoǵamdyq uıymdar men astanalyqtardy memlekettik nagradalarmen marapattady.

Bul týraly elorda ákimdiginiń baspasóz qyzmeti habarlady.

Altaı Kólginov jıynǵa qatysýshylardy Táýelsizdik kúnimen quttyqtap, elimizdiń, qalamyzdyń ıgiligi jolynda atqaryp júrgen ári jaýapty, ári izgi eńbekterine alǵysyn bildirdi.

«Bizdiń elordamyz – táýelsizdigimizdiń sımvoly. Elbasymyz Nursultan Ábishuly Nazarbaevtyń sarabdal saıasatynyń arqasynda elordamyz memleketimizdiń áleýmettik-ekonomıkalyq jáne saıası jetistikterin aıshyqtaıtyn jarqyn qalaǵa aınaldy. QR Prezıdenti Qasym-Jomart Kemeluly Toqaev Táýelsizdik jolyn jetistiktermen jalǵastyryp, jumys atqarýymyz kerektigin atap ótti. Qalamyzdyń, elimizdiń damýyna árbir azamat úles qosyp otyr. Elordamyz kúni-túni tynbaı qar tazalap, eńbek etetin kommýnaldyq qyzmetterdiń, árbir úıge jylý jetýi úshin eńbek etetin JEO qyzmetkerleriniń, adam ómiri úshin ár sát saıyn kúresetin dárigerlerdiń arqasynda ósip-órkendep, damý ústinde. Ustazdar qaýymy, qurylysshylar, elektrık, santehnıkter, júrgizýshiler árbirińizdiń eren eńbegińiz jatyr. Biz sizderdiń eńbekterińizdi baǵalaımyz, qurmetteımiz», - dedi elorda ákimi A. Kólginov.

Jıynda «Qurmet» ordenimen joǵary sanatty dáriger Qýatbek Ǵabdýllın, eńbek ardageri Murat Irgıbaev, hımııa ǵylymdarynyń doktory Raýshan Sarmýrzına marapattaldy.

Sýmen jabdyqtaý qyzmetiniń slesari Robert Ramazanov ІІІ dárejeli «Eńbek Dańqy» ordenin aldy. Arys qalasyn elektrmen jabdyqtaýda qalpyna keltirý, jóndeý jumystaryna qatysqan marqum Ermek Tıýtıýbekovke «Erligi úshin» medali berildi. Ermek Tıýtıýbekov 2019 jyly 8 tamyzda Arys-Shymkent trassasynda bolǵan jol-kólik apaty saldarynan qaıtys bolǵan edi. Ústimizdegi jyldyń naýryz aıynda qalada bolǵan iri jol-kólik oqıǵasy kezinde zardap shekkenderge kómek kórsetken 24 jasar Álibek Baqdáýlet Qurmet gramotasymen marapattaldy. Ózi de qoǵamdyq kólikte júrgizýshi bolyp jumys isteıtin Álibek sol kúni jolaýshylar sapynda bolǵan edi.

«Igilikti is jasaý úshin joǵary qyzmette otyrý mindet emes, «árbir adam - qoǵam úshin paıdaly bola alady» deıdi ol.

Sondaı-aq, «Parasat» ordenimen, «Eren eńbegi úshin», «Shapaǵat» tósbelgilerimen, alǵys hattarmen muǵalim, dáriger, júrgizýshiler, eńbek ardagerleri marapattaldy.

Elorda turǵyndary men qonaqtary úshin Táýelsizdik kúnine oraı merekelik kontsert uıymdastyryldy.