Táýelsizdik kópiri Ózbekstan arqyly jol júretin turǵyndarǵa kómek boldy – Ómirzaq Shókeev
«Sovettik zamanda júzege aspaı armanǵa aınalǵan jobalardy atap aıtsaq, Syrdarııa ózeninde 430 metrlik Táýelsizdik kópiri salyndy. Bul kópirdiń mańyzy óte zor boldy. Óıtekeni sol kezde Maqtaral, Jetisaıdaǵy 350 myń turǵyn respýblıkalyq kúrejolǵa shyǵý úshin Ózbekstan terrıtorııasymen kóptegen tekserister arqyly ótetin edi. Qazir osy joldyń arqasyna tikeleı shyǵatyn boldy. Buǵan qosa Jetisaı men Maqtaaral halqyn Shardara sý qoımasy arqyly oblys ortalyǵymen jalǵaıtyn Arnasaı aınalma joly salyndy. Bul Shardara, Jetisaı, Maqtaaral óńirlerin oblys ortalyǵy Túrkistanmen jalǵaıtyn eń qysqa magıstral boldy», - dedi Ó. Shókeev Ortalyq kommýnıkatsııalar qyzmetinde ótken baspasóz máslıhatynda.
Oblys ákimi Tashkent, Almaty, Qyzylorda baǵyttarynda Batys Eýropa – Batys Qytaı halyqaralyq tranzıttik kólik dálizi salynǵanyn atap ótti.
«Bul dálizdiń 448 shaqyrymy bizdiń óńirden ótedi. Qazir osy magıstralǵa úırenip qaldyq. Bul joldaǵy júk aınalymy 2,5 esege artty jáne kóptegen turǵyndarymyz úshin tabys kózine aınaldy. Táýelsizdik jyldary jalpy oblys aýmaǵynda 8 myń shaqyrymnan astam jol salyndy, 71 kópir jóndeý jumystarynan ótti. Nátıjesinde qanaǵatty jaǵdaıdaǵy jol úlesi 87 paıyzǵa jetti», - dedi ákim.
Sonymen birge, Syrdarııa boıyndaǵy eldimekenderdi sý tasqynynan qorǵaý úshin Kóksaraı sý rettegishi iske qosylǵan.
«Bul rettegish bolmaı turǵanda jyl saıyn Úkimet rezervinen qarjy bólinip otyratyn. Qazir ol sýdy Kóksaraı rettegishi arqyly Syrdarııa arnasyn baqylap otyrýǵa bolady. Oǵan qosa, bul qoıma jylda Shardara sý qoımasyna syımaı, syrtqa ketetin 3 mlrd tekshe metr sýdy qys kezeńinde saqtap qalyp, vegetatsııa kezeńinde Qyzylorda oblysynyń paıdasyna berip otyrýǵa múmkindik berdi. Bul jerde qosymsha 38 myń gektar lımandyq jaıylym jer paıda boldy. Aýmaqtaǵy mal sany eki esege kóbeıdi», - dedi Ó. Shókeev.