Táýelsizdik kezeńinde 1800-den astam mektep salyndy - Prezıdent
16:42, 15 Jeltoqsan 2021
NUR-SULTAN. QazAqparat – Táýelsizdik kezeńinde 1800-den astam mektep salyndy. Bul týraly Táýelsizdiktiń 30 jyldyǵyna arnalǵan saltanatty is-sharada QR Prezıdenti Qasym-Jomart Toqaev aıtty, dep habarlaıdy QazAqparat tilshisi.
«Balalardy balabaqshamen qamtý kórsetkishi 1999 jyldan beri 10 ese ósti. Táýelsizdik kezeńinde 1800-den astam mektep salyndy. 21 Nazarbaev zııatkerlik mektebi ashyldy. Biz kadr daıyndaýdyń jańa tásiline kóshtik», - dedi QR Prezıdenti.
Qasym-Jomart Toqaevtyń atap ótýinshe, memlekettik bilim berý tapsyrysy jyl ótken saıyn kóbeıip, sońǵy 20 jylda onyń sany 5 ese ósken.
«Kúrdeli kezeńge qaramastan «Bolashaq» baǵdarlamasy júzege asyryla bastady. Bilim berý salasynyń eń ozyq mekemesine aınalǵan Nazarbaev Ýnıversıteti quryldy. Ǵylym salasyn damytýǵa arnalǵan qarjy kólemi birneshe ese artty. Sonyń arqasynda jańa ınstıtýttar men ǵylymı ortalyqtar ashylýda, jas ǵalymdardyń qatary kóbeıýde», - dedi Memleket basshysy.