«Táýelsizdik dáýiri» kitabynda jańa shejiremizdiń bolmysy túgel qamtylǵan - Darhan Qydyráli
«Bul kitap azattyqtyń aq tańyndaǵy jas memlekettiń alǵashqy demin, árbir qadamyn, eńsesin tiktep, qulashyn qalaı jazǵanyn naqty dáıektermen jınaqtaǵandyqtan, ony Táýelsizdik tarıhynyń atlasy, jańa shejiremizdiń boıaý-bolmysy túgel qamtylǵan tutas kartınasy deýge bolady. Biz ádette tarıhty zerdelegende kezeńderdi jyldarmen, dáýirlerdi ǵasyrlarmen ólsheımiz. Keıde bul ataýlar ýaqyttyń uzaqtyǵymen emes, mańyzdy oqıǵalarymen de ólshenedi. Bul turǵydan alǵanda, júz jylǵa bergisiz shırek ǵasyr Táýelsizdik dáýiriniń bastaýy boldy. Bul kezeń osy kitapta «Uly dáýir» dep atalady. Osy dáýirde jańa turpatty memlekettiń, jańa qoǵamnyń barlyq salasy óz tarıhynyń alǵashqy paraǵyn ashyp, jetistikterge toly jylnamasy jazyla bastady. Qazaqstannyń qurylýy men qalyptasýy hronologııalyq jáne júıeli túrde qamtylǵan bul irgeli eńbekte Táýelsizdik jyldaryn jańǵyrýdyń úsh tolqynyna balaǵan Nursultan Ábishuly el tarıhyn kezeń-kezeńge bólip, árbir salany jeke dara qarastyrady. Biz kitaptan oqıǵalardyń qalaı órbigenin, shıelenisti jaıttardyń qalaı sheshilgenin ǵana emes, olardyń túpki sebebi men qısynyn da tabamyz», - dep atap ótti Darhan Qydyráli.
Sonymen qatar ol elimizde eń kóp talqylanatyn máseleniń biri qazaq tili ekenin, memlekettiń tildiń máselesi Táýelsizdiktiń eleń-alańynan beri Elbasynyń nazarynan tys qalmaǵanyn atap ótti.
«Bul týraly avtor «qazaq tili qazaq ultynyń mádenı tutastyǵynyń basty qaınar kózi, ǵasyrlar boıy solaı bolǵan, bolashaqta da solaı bola beredi» deı otyryp, til saıasatynyń tetikteri týraly jazady. Memleket basshysynyń ult bolmysynyń ajyramas ajary, rýhanı dińgegi, ómirsheń ózegi sanalatyn mádenıet pen ónerge de aıryqsha yqylaspen qamqorlyq jasap kele jatqany belgili. Osy qasterli qaǵıdatty kitaptyń «myńjyldyq qazaq mádenıeti jas eldiń táýelsizdiginiń senimdi tiregine aınaldy» degen sózinen tabamyz», -deıdi D. Qydyráli kitap jaıynda aıta kele.
«Odan ári Memleket basshysy: «Memlekettiń mádenıetke jáne tarıhı-mádenı muraǵa degen ustanymy ótkenge súıenbeı, bolashaqqa qadam jasaý múmkin emes degenge saıasady. Tarıhı sabaqtastyq pen ótken shaqpen baılanys qana Táýelsiz Qazaqstannyń ilgeri damýyna irgetas bola alady» dep jazady. Osy arqyly 90-shy jyldardaǵy Naýryz meıramynyń dúnıege kelýinen bastap, aýqymdy «Mádenı mura» jáne búgingi «Rahanı jańǵyrý» baǵdarlamalarynyń zańdy sabaqtastyǵyn tabamyz», - dedi ol.
Sonymen qatar kitapta myńdaǵan oqıǵalar aıtylyp, kóptegen tulǵalardyń esimderi atalǵan. Bul bizge Táýelsizdik dáýirinde árbir detaldyń mańyzdy ekinin bildirýmen qatar, avtordyń zamandastaryna degen erekshe qurmetin de sezdiredi.
«Eń bastysy, avtor atap kórsetkendeı, bul kitap Táýelsiz Qazaqstannyń dańqty tarıhyn bilýge jáne túsinýge, elimizdi maqtan eter jasampazdar qatarynyń kóbeıýine septesedi dep senemiz. Sondyqtan dáıekti derektermen órilgen «Táýelsizdik dáýiri» qazaq eliniń tarıhyna úńiletin zertteýshiler men ótkenimizdi zerdeleıtin árbir oqyrmannyń udaıy júginetin kitaby bolady dep oılaımyz. Sebebi bul - jasampaz jyldardyń jıyntyq jylnamasy, Máńgilik Eldiń temirqazyǵyna aınalǵan tutas dáýirdiń shejiresi», - dep túıindedi sózin Darhan Qydyráli.