Táýelsizdik dańǵylyndaǵy jańa kópir ashylsa, keptelis máselesi sheshile me

ASTANA. QazAqparat – Elordada Táýelsizdik dańǵyly boıynda salynyp jatqan kópirdi jyl sońyna deıin paıdalanýǵa berý josparlanyp otyr. Jańa kópirdi iske qosý qaladaǵy kólik keptilisi máselesin sheshýge qalaı áser etpek? Bul suraqqa Astana qalasy ákimdigi apparatynyń jetekshisi mindetin atqarýshy Nurlan Álimjanov jaýap berdi, dep habarlaıdy QazAqparat tilshisi.

«Jyl sońyna deıin Táýelsizdik kópiri arqyly jol qozǵalysyn qamtamasyz etý josparlanyp otyr. Atalǵan kópir jol qozǵalysyn edáýir jeńildetýge múmkindik beredi. Aıtar bolsaq, Táýelsizdik dańǵyly, jańa temirjol vokzaly aýdany, Qoshqarbaev dańǵyly, Nájimedenov kóshesi, Áziret Sultan meshiti aýdany, Baıtursynov kóshesi, Qordaı, Aınakól, Momyshuly dańǵyly jáne taǵy basqa kósheler boıynda jol qozǵalysynyń aıasy keńeıe túspek», - dep jaýap berdi Nurlan Álimjanov QazAqparat agenttiginiń resmı saýalyna.

Kópirdiń jalpy uzyndyǵy - 910 m, eni – 36 m, al shamdardyń bıiktigi - 5-ten 16 metr aralyǵynda bolady.

Aıta ketsek, atalǵan jobanyń negizgi tarıhı motıvi - tyń jerlerdi ıgerý úderisin kórsetý. Kópirde 4 baǵan bar, olar oıý-órnektermen bezendiriledi.

Kópirdiń josparyna sáıkes, keń trotýarlar, velosıped jolaqtary jáne kireberis qarastyrylǵan.

Táýelsizdik kópiri elordadaǵy Esil ózeniniń oń jáne sol jaǵalaýyn baılanystyrady. Bul joba «Astana - jaıly qala» jospary aıasynda júrgizilip jatyr.

Sondaı-aq, buqaralyq sportty nasıhattaý maqsatynda oıyn alańdary men kópir mańynda qoǵamdyq keńistikter qurý josparlanǵan.

Eske salaıyq, bıyl qańtardyń sońynda Memleket basshysy elordany odan ári damytý máseleleri boıynsha keńes ótkizdi.

Sol kezde Prezıdent Táýelsizdik dańǵylyndaǵy kópir qurylysyn jyl sońyna deıin aıaqtaý qajettigin aıtqan edi.