Táýelsizdik aldyndaǵy demografııalyq daǵdarysty eńserdik - Memleket basshysy

NUR-SULTAN. QazAqparat - Táýelsizdikten asqan qundylyq joq, ony qadirleý barshamyzdyń qasıetti boryshymyz. Bul týraly búgin Aqordada birqatar azamatqa memlekettik nagradalardy tapsyrý barysynda Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Tuńǵysh ret halqymyz óz taǵdyryna ıe boldy. Búginde azamattarymyz óziniń jáne memleketimizdiń bolashaǵyna nyq senimmen qaraıdy. Elimiz san qıly tarıh zulmattaryn ótkerip, eńsesin tiktedi. Álem qoǵamdastyǵyna nyq qadam basty. Halyq sany 2 mıllıonǵa kóbeıip, Táýelsizdik aldyndaǵy demografııalyq daǵdarysty eńserdik. Qazir biz 18,5 mıllıonnan astyq. Memleketimizdiń damý baǵdaryn ózimiz aıqyndaý múmkindigin aldyq», - dedi Q.Toqaev.

Memleket basshysy búginde elimizdiń jańǵyrý úrdisin Qazaqstan joly dep aıtatyndyǵyna nazar aýdartty.

«Osyndaı aýqymdy ózgeristerge Tuńǵysh Prezıdentimiz Nursultan Nazarbaev bastamashy jáne kóshbasshy boldy. Jahan jurtshylyǵy Elbasymyzdy álemdik deńgeıdegi tarıhı tulǵa retinde moıyndady. Barlyq salada tolaıym tabysqa keneldik dep kúmánsiz aıtýǵa bolady. Muny búgingi býyn jáne keler urpaq baǵalaýy kerek. «Beınet kórmeı dáýlet joq» dep hákim Abaı aıtqandaı, biz buǵan ońaılyqpen jetken joqpyz. Sondyqtan bul mereke búkil halqymyzǵa ortaq táýbeniń toıy, mártebeniń merekesi. Táýelsizdikten asqan qundylyq joq. Ony qadirleý barshamyzdyń qasıetti boryshymyz», - dedi Qazaqstan Prezıdenti.