Táýelsiz jas memleketimizdiń qalyptasýyna laıyqty úlesimizdi qosamyz jáne bizge artqan senimińizdi aqtaımyz - Prezıdent poshtasynan

ASTANA. 23 mamyr. QazAqparat - Memleket basshysy Nursultan Nazarbaevtyń atyna Qazaqstan óńirlerindegi jastar uıymdarynan hattar kóptep kelip túsýde, dep habarlady QR Prezıdentiniń baspasóz qyzmeti.  

Óz hatynda ««Kásip.kz» tehnıkalyq jáne kásibı bilim uıymy respýblıkalyq jastar qaýymdastyǵy» qoǵamdyq birlestiginiń ókilderi Prezıdentke Qazaqstan jastaryna kórsetken qoldaýy úshin alǵys aıtady.

«2012 jylǵy sáýirde «Kásip.kz» qoǵamdyq birlestiginiń alǵashqy respýblıkalyq sleti bolyp ótti. Sol kúni Qazaqstan elordasynda Qazaqstan halqy Assambleıasynyń XIX sessııasy ótip jatýynyń sımvoldyq máni bar. Osy mańyzdy sharany qostaǵan sletke qatysýshylar tehnıkalyq jáne kásibı bilim mekemeleriniń oqýshylary eldi ındýstrııalandyrý isine naqty úlesterin qosý qajettigi týraly aıtty», - delingen hatta.

«Kásip.kz» birlestiginiń músheleri ındýstrııalyq-ınnovatsııalyq damý jolyn tańdaǵan Qazaqstanda búginde jumysshy mamandyǵyn naryq talap etip otyrǵanyn, sondyqtan bul mamandyq jastar arasynda tanymaldyqqa ıe ekenine toqtalyp ótken.

«Bizben - Qazaqstan jastarymen baılanystyrǵan Sizdiń josparlaryńyz ben úmitterińizdi shyndyqqa aınaldyramyz dep senemiz. Biz táýelsiz jas memleketimizdiń qalyptasýyna laıyqty úlesimizdi qosamyz jáne bizge artqan senimińizdi aqtaımyz», - dep atap ótken hat ıeleri.

«Sizdiń Qazaqstan halqy Assambleıasynyń XIX sessııasynda sóılegen sózińizben tanysa kele, men elimizde jastarǵa qamqorlyq jasalyp jatqanyn taǵy da atap ótpekpin. Sońǵy jyldary bul salada memlekettik baǵdarlamalar bekitilip, tabysty júzege asyrylýda. Men óz elimniń patrıotymyn jáne bolashaqqa senimmen qaraımyn. Qazaqstannyń álemdegi básekege qabiletti 50 eldiń qataryna qosylatynyna senemin. Biz, jastar, elimizdi jańa bıikterge kóterýge ázirmiz», - dep jazady «Pozıtıv Lısakovsk» jastar aptalyǵynyń  redaktory, «Jas Otan» jastar qanatynyń múshesi M.Sýshko.

Óz kezeginde Qostanaı oblysynyń Qarasý aýylynyń turǵyndary Prezıdentke jazǵan hattarynda Qazaqstannyń jyl ótken saıyn qaryshty órkendep kele jatqanyn atap ótken. Elimizdegi turaqtylyqtyń arqasynda jas otbasylar qatary kóbeıýde, jastar keleshekteri kemel bolaryna kózderi jetip, respýblıkany damytý isine belsene atsalysýda.