Taýary sertıfıkattalmaǵan ımporttaýshylarǵa 6,2 mln teńgege aıyppul salyndy

NUR-SULTAN. QazAqparat – 2021 jyly Qazaqstanǵa taýar jetkizýshi ımport ókilderine ónim sertıfıkatynyń bolmaǵany úshin 6,2 mln teńgege aıyppul salyndy. Bul týraly QR Saýda jáne ıntegratsııa mınıstrligi tehnıkalyq retteý jáne metrologııa komıteti tóraǵasynyń orynbasary Qýanysh Elikbaev málim etti, dep habarlaıdy QazAqparat tilshisi.

«Importtyq taýarlardy rásimdeýde zań buzýshylyq faktisi rastalǵan jaǵdaıda zań aıasynda hattama toltyrylady. Atalǵan zańbuzýshylyq úshin 90-nan 600 AEK-ke deıin aıyppul qarastyrylǵan. Memlekettik kirister komıtetimen ózara is-qımyl aıasynda ótken jyly taýary sertıfıkattalmaǵan ımporttaýshylarǵa 6,2 mln teńgege aıyppul salyndy. Sonymen qatar taýardyń sáıkestikti baǵalaý boıynsha turaqty monıtorıng júrgiziledi», - dedi Q. Elikbaev brıfıngide.

Sondaı-aq, komıtet basshysynyń orynbasary jalǵan sertıfıkat jasaý máselesin kóterdi.

«2021 jyly oıynshyqtar, jeke qorǵanys quraldary, turmystyq elektrotehnıka, tamaq jáne jeńil ónerkásip ónimderine arnalǵan 282 deklaratsııa men sertıfıkattyń kúshi joıyldy. Sol sııaqty bizdiń komıtet ótken jyly jalpy sany 422 sertıfıkat pen 426 sáıkestik deklaratsııasyn alyp tastap, 88 mln teńgege aıyppul saldy. Sonymen qatar, jalǵan sertıfıkatpen kúreste memlekettik baqylaý nátıjeleri boıynsha qaýipti ónimniń tizilimi jasaldy. Osy jaǵdaıdy kedendik tekserý kezinde eskerý kerek. Bul qaýipti ónimderdi shekaradan ótkizbeýge múmkindik beredi», - deıdi ol.

Buǵan deıin komıtet basshysynyń orynbasary elimizge syrttan keletin taýarlarǵa baqylaý qalaı júretini týraly aıtty.

Odan bólek, ótken jyly elimizge 41,2 mlrd AQSh dollarǵa taýar ákelingeni habarlandy.