Taýarlyq gaz baǵasy qymbattaıdy, sebebi ne – sarapshy pikiri

<p>ASTANA. KAZINFORM &ndash; Elimizde gazdyń arzan óndirisi dáýiri aıaqtalyp keledi. Bul jaıynda Energetıka mınıstrligi janyndaǵy qoǵamdyq keńestiń múshesi Oljas Baıdildınov aıtty.</p>

«Bul tabıǵı gaz baǵasynyń alǵashqy ári sońǵy kóterilýi emes. Onyń baǵasy shyǵynǵa batyryp jatyr. «QazaqGaz» ulttyq operatory kógildir otyndy birshama joǵary baǵamen satyp alyp, gaz taratýshy uıym – «Qaztransgazǵa» tekshe metrine 11 myń teńge tómen baǵamen satady. Demek, aqsha joǵaltyp otyr degen sóz», - dedi ol agenttik tilshisine bergen suhbatynda.

Onyń atap ótýinshe, elimizde tabıǵı gazdyń ózindik quny qymbat. Óıtkeni, elimizde óndiriletin gazdyń 85 paıyzy úsh iri jobaǵa Teńiz, Qarashyǵanaq jáne Qashaǵanǵa tıesili. Al olar taza otandyq joba emes ekendigi belgili.

«Olar qazaqstandyq joba emes. Árıne, baǵa formýlasy bar. Ol dollar baǵamy men atalǵan taýardyń ózindik qunyna baılanysty. Sodan joǵary baǵa shyǵyp otyr. Buǵan qosa, bul taýardyń ózindik quny óte joǵary ekendigi de túsinikti. Ózderińiz biletindeı, Qazaqstan energııa tasymaldaýshy, onyń ishinde tabıǵı gaz baǵasy óte arzan TOP-10 el qataryna únemi kiredi. Ótken jyly jarııa etken esepteýime sáıkes, tabıǵı gaz baǵasy halyq úshin shamamen úsh ese ósedi. Soǵan daıyn bolýymyz qajet», - dedi sarapshy.

Sarapshynyń aıtýynsha, Qazaqstan gaz derjavasy sanalmaıdy ári kógildir otyn qory boıynsha álemde shamamen 30-orynda tur.

«Jalpy, munaı óndirý janar-jaǵarmaı men otyn baǵasyn belgili bir deńgeıde ustap turýǵa múmkindik bergenimen tabıǵı gazǵa qatysty ahýal múldem basqa. Baǵanyń bul kóterilýi kógildir otyndy únemdeýdi úırenýge de baǵyttalyp otyr», - dedi Oljas Baıdildınov.

Esterińizge sala ketsek, búgin elimizdiń Energetıka mınıstrligi taýarlyq gazdyń kóterme shekti baǵasyn 1 shildeden bastap qymbattatylǵan baǵamen bekitken edi.