Taýarlaryn elektrondy túrde ótkizetin sheteldik ınternet kompanııalar QQS tóleıtin bolady
«Zań jobasynda Qazaqstan azamattaryna qyzmet kórsetetin sheteldik ınternet kompanııalary qosylǵan qun salyǵyn, basqasha aıtqanda «Google salyq» salýǵa múmkindik beretin normalar usynylady. «Google salyqty» tek sheteldik ınternet kompanııalar tóleıtin bolady. Zańdy jáne jeke tulǵalarǵa bul normanyń qatysy joq. Osyǵan baılanysty salyq salynatyn bazanyń keńeıtiletinin eskere otyryp, bıýdjettiń kiris bóligi qanshalyqty ulǵaıady? Aldyn ala esepteý júrgizildi me?», - dep surady Májilis depýtaty Fahrıddın Qarataev.
Óz kezeginde Ulttyq ekonomıka mınıstri Rýslan Dálenov norma sheteldik ınternet kompanııalarǵa qatysty ekenin naqtylady.
«Qazaqstandyq tóleýshilerge qatysty bolmaıdy. Norma sheteldik kompanııalarǵa Qazaqstanda esepke turýǵa jáne qosymsha qun salyǵyn tóleýge múmkindik beredi. Bul óz kezeginde halyqaralyq standartqa sáıkes keledi. Sheteldik ınternet kompanııalar Qazaqstanda kórsetiletin qyzmetter kólemi, aınalymy boıynsha qosylǵan qun salyǵyn tóleýge daıyn. Biraq, bul úshin tólemge qatysty tıisti norma bolmaǵan edi. Endi osy normalar usynylyp otyr. Bıýdjet kiristerin ulǵaıtý baǵytyna toqtalsaq, osy qyzmetter kólemi aýqymdy bolmaǵandyqtan, QQS jylyna 2 mlrd teńge somasynda baǵalanýda. Eger qyzmetter kólemi ósetin bolsa, salyq kólemi de artady. Biz ony baqylaımyz», - dedi R. Dálenov.
Budan buryn habarlanǵandaı, búgin Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine salyq salý jáne ınvestıtsııalyq ahýaldy jetildirý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy.
Qujat boıynsha jeke tulǵalarǵa qyzmetteri men taýarlaryn elektrondy túrde ótkizetin sheteldik ınternet-kompanııalar qosylǵan qun salyǵyn tóleýge mindetti bolady.