Taýarlardy tańbalaý qandaı nátıje beredi
Kelisimge Almaty qalasynda 2018 jyldyń 2 aqpanynda qol qoıyldy.
«Kelisimniń negizgi maqsattary taýarlar aınalymynyń zańdylyǵyn qamtamasyz etý, tutynýshylardyń quqyǵyn qorǵaý, kóleńkeli ekonomıkany azaıtý, bıýdjetke salyqtardyń túsimin arttyrý, odaq aýqymynda bıznesti júrgizýdegi básekelestik sharttaryn teńestirý bolyp tabylady. Kelisimniń erejesi tańbalaý engizýdiń tártibi men merzimin belgileýdi, taýarǵa sáıkestendirý quraldarynyń jáne olardy taýarlarǵa jelimdeýdiń biryńǵaı talaptaryn, Eýrazııalyq ekonomıkalyq odaqqa múshe-memleketter arasynda tańbalanǵan taýarlar týraly beriletin málimetterdiń qurylymy men quramyn retteıdi», - dedi QR Qarjy vıtse-mınıstri Qanat Baedilov.
Atap aıtqanda, kelisim boıynsha Kedendik odaq aýmaǵyna ákelingen jáne odaq aýmaǵynda óndirilgen taýarlar tańbalaýǵa jatady. Bul rette, taýarlardy Kedendik odaq aýmaǵynan tysqary jerlerde de tańbalaýǵa ruqsat etiledi. Tańbalanatyn taýarlardyń tizbesi odaqqa kiretin elderdiń usynysy boıynsha Eýrazııalyq ekonomıkalyq komıssııa keńesimen biraýyzdan bekitiledi. Ol úshin tańbalaý engizýdiń maqsatqa saı ekendigi týraly tolyq taldaý usyný qajet.
Vıtse-mınıstrdiń sózine qaraǵanda, keıbir jaǵdaılarda taýarlar tańbalaýǵa jatpaıdy. Mysaly, óndirilgen taýarlardy Odaqtyń kedendik aýmaǵynan syrtqa shyǵarǵan jaǵdaıda jáne jeke tulǵalardyń óz qajettiligi úshin ákelgen taýarlardy tańbalaýdyń qajeti joq.
«Aıta ketken jón, búgingi tańda tańbalaý ınstıtýty álemniń kóptegen damyǵan elderinde qalypty jaǵdaıda qoldanylýda. Taýarlardyń árbir birligin tańbalaý, ony ımporttaýshydan jáne óndirýshiden bastap sońǵy tutynýshyǵa deıin qadaǵalaý ekonomıkany tsıfrlandyrýdyń tıimdi quraldarynyń biri bolady. Kelisimdi iske asyrý respýblıkalyq bıýdjetten qarjy shyǵarýdy qajet etpeıdi», - dedi ol.