Taýardyń eksportyna qujattar barynsha qysqarady

ASTANA. QazAqparat - Taýardyń eksporty men ımportyna qatysty qujatnamalar barynsha qysqarady. Bul týraly búgin Dúnıejúzilik keden uıymynyń eýropalyq óńiriniń kedendik qyzmetteri basshylarynyń konferentsııasynda QR Premer-Mınıstriniń birinshi orynbasary Baqytjan Saǵyntaev málim etti.

«Búginde bizdiń shekaralarymyz adal halyqaralyq saýda úshin ashyq. Degenmen de olar qazirgi zamanǵy álemniń syrtqy syn-qaterine, ıaǵnı lańkestikke, esirtki saýdasyna, kontrabanda, kóleńkeli bızneske tosqaýyl bolýǵa mindetti. Sondyqtan da qazirgi zamanǵy keden - shyn máninde zańdy bıznes úshin servıstik qyzmet. Osy rette kedendik sala zańdy bızneske kedergi bolmaýy tıis. Bıznes úshin keden organdary qolaıly jaǵdaılar jasaýy tıis. Bul turǵyda Qazaqstan tıisti jumystardy atqaryp jatyr»,-dedi B. Saǵyntaev.

Onyń sózine qaraǵanda, Dúnıejúzilik banktiń «Doing Business» reıtınginde Qazaqstan eleýli jetistikterge jetti. Alaı da, «Halyqaralyq saýda» ındıkatory boıynsha atqaratyn sharalar bar.

«Osy baǵytta kemshilikterdi joıý boıynsha belsendi jumystar júrgizip jatyrmyz. Bul elektrondy kedendik deklaratsııalaýdy engizýge, taýarlar qozǵalysyn týra qadaǵalaý júıesine, biryńǵaı tereze tetigine, ótkizý beketterin modernızatsııalaýǵa qatysty. Biz ımportqa da, eksportqa da qujattardy barynsha qysqartýdamyz»,-dedi Premer-Mınıstrdiń birinshi orynbasary.