Taýar men qyzmetterdi «bir qoldan» satyp alý máselesi ýshyǵyp tur

ASTANA. QazAqparat - Búgin QR Qarjy vıtse-mınıstri Rýslan Beketaev depýtattarǵa memlekettik satyp alýlar kezinde taýar men qyzmetterdi bir arnadan, ıaǵnı "bir qoldan" satyp alý máselesin kórsetip berdi, dep xabarlaıdy QazAqparat tilshisi.

Memlekettik jáne kvazımemlekettik satyp alýlar týraly zańnamaǵa engiziletin ózgerister men tolyqtyrýlardy tanystyrý kezinde R.Beketaev gosreestr.kz saıtyn ashyp, kózge túsken birinshi lotty tańdady. "Endi, qarańyz, myna jerde barlyq negizgi memlekettik satyp alýlardy kórýge bolady. Barlyǵy bir arnadan satyp alyndy. Kez kelgen lotty ashyp kóreıik. Mine, 16 mlrd teńgeniń bir loty bar. 13 kompanııa qatysty. Biraq birde-bireýi tapsyrys berýshiniń talaptaryna saı kelmedi. Artynan bárin bir arnadan satyp alypty. Ásirese, qurylys jumystary salasynda bir mıllıardtan asatyn satyp alýlar "iske aspaı qalǵan" bolyp shyǵady. Básekeniń kórinisi bolsyn dep 6-7 kompanııaǵa qatysýǵa múmkindik beredi de, artynan bir ǵana kompanııamen kelisim jasaıdy. Baǵany da sharyqtatyp qoıady", - dedi R.Beketaev.

Vıtse-mınıstrdiń aıtýynsha, búginde taýar men qyzmetterdi "bir qoldan" satyp alý máselesi osy salanyń basty problemasy bolyp tur. Qazirgi málimetke sáıkes, ótken jyly bolǵan satyp alýlardyń basym bóligi - 60 paıyzy "oryndalmaǵandardyń" qataryna qosyldy. Ondaıda lotty iske aspaı qalǵan etip shyǵarady da, artynan bir kompanııamen kelisim jasaı salady. "2018 jyldyń basynan beri uıymdastyrylǵan satyp alýlar da osy máseleni ashyq kórsetip otyr. Qazirdiń ózinde lottardyń 80 paıyzyn oryndalmaǵan bolyp jarııalanady", - dep atap kórsetti R.Beketaev.