Taýar belgisi quqyǵyn buzǵan 157 adam ákimshilik jaýapkershilikke tartyldy
«Ótken jyly taýar belgilerine arnalǵan quqyqty qorǵaý jelisi boıynsha 200-den astam tekserý júrgizdik. Ózderińizde biletindeı, búgingi zańnamaǵa sáıkes ádilet organdarynyń mundaı tekserýlerdi júrgizýge jáne taýar belgisine arnalǵan quqyq buzylǵany úshin ǵana ákimshilik jaýapkershilikke tartýǵa quqy bar. Al avtorlyq jáne ónertabys quqyqtaryna qatysty máseleler ózge memlekettik organdarǵa tıesili», - dedi ol Ádilet mınıstrliginde ótip jatqan dóńgelek ústel aıasynda BAQ ókilderine bergen suhbatynda.
Onyń dereginshe, ótken jyly taýar belgilerine arnalǵan quqyqtyń buzylýyna qatysty 208 tekserý júrgizilip, ákimshilik quqyqbuzýshylyq týraly 168 hattama toltyrylǵan.
«Qazirdiń ózinde 157 adam jaýapkershilikke tartyldy, qalǵandary sotta qaralýda. 16 mıllıon teńgeden astam aıyppul salynyp, 16 mıllıonnan astam kontrafaktilik ónim tárkilendi. Quqyq ıelenýshi bul jaıynda biledi, biz olarmen jumys isteýdemiz. Sebebi shyǵyndy tek qana quqyq ıelenýshi ǵana anyqtaı alady», - dedi departament dırektorynyń orynbasary.
Beket Álǵojınnyń aıtýyna qaraǵanda, negizinen ónerkásiptik óndiris taýarlaryn, kıim-keshek pen azyq-túlik ónimderin shyǵarý quqyqtary jıi buzylady.
«Qytaı kontrafaktilik ónimderdiń negizgi jetkizýshi sanalady. Sondyqtan jergilikti jerlerde ǵana emes shekarada da sharalar qabyldanady. Atap aıtqanda, keden organdary taýarlardyń ishki naryqqa enýine tosqaýyl qoıyp otyrady. Sodan keıin Keden kodeksine sáıkes taýar belgisiniń ıesine eskertedi. Sebebi quqyq ıelenýshi sotta azamattyq is qozǵaı alady nemese quqyq qorǵaý organdaryna júginedi», - dedi ol.