Taý-ken jáne óńdeý ónerkásibi sektoryna tartylǵan ınvestıtsııa artty

ASTANA. QazAqparat – BAQ ókilderiniń qatysýymen ótken brıfıngide Syrtqy ister mınıstriniń orynbasary Almas Aıdarov byltyr el ekonomıkasynyń qaı salalaryna sheteldik ınvestıtsııa tartylǵanyn aıtty, dep habarlaıdy QazAqparat tilshisi.

«Salalar bólinisinde eń kóp sheteldik ınvestıtsııa kólemi taý-ken óndirý ónerkásibine – 12,1 mlrd dollar, óńdeý ónerkásibine – 5,6 mlrd dollar, kóterme jáne bólshek saýdaǵa – 5,08 mlrd dollar, kásibı, ǵylymı-tehnıkalyq qyzmetke – 1,1 mlrd dollar, kólik jáne qoıma – 1,1 mlrd dollar, qurylys – 700 mln dollar kóleminde baǵyttaldy. Aıta ketý kerek, 2005-2014 jyldar aralyǵynda tikeleı ınvestıtsııalar aǵynynyń jalpy qurylymyndaǵy óńdeý ónerkásibiniń úlesi orta eseppen 10%-dan az boldy. 2015-2022 jyldar kezeńinde óńdeý ónerkásibine ınvestıtsııalardyń ortasha úlesi eki esege jýyq ósip, 18,7%-ǵa jetti», - dedi mınıstrdiń orynbasary.

Almas Aıdarov shetelden ınvestıtsııa tartý boıynsha Qazaqstan Ortalyq Azııada kósh bastap turǵanyna da toqtaldy. Onyń sózinshe, byltyr ınvestorlar elimizge 28 mlrd dollarǵa jýyq qarajat baǵyttaǵan.