Taý-ken ornyndaǵy júrgizýshilerdi merziminen buryn zeınetke shyǵarý máselesi qaralýda - Albert Raý
«Sokolov-Sarybaı taý-ken baıytý óndiristik birlestigi» AQ avtomobıl tsehynyń karerlik mashınalarynyń júrgizýshilerimen kezdesýde depýtat «AMANAT» partııasynyń saılaýaldy ýádelerin júzege asyrý, júrgizýshilerdiń merziminen buryn zeınetke shyǵý quqyǵyn qamtamasyz etý, sondaı-aq Rýdnyı qalasynyń kommýnaldyq ınfraqurylymyn jańartý týraly aıtty.
Zııandy óndiristerde jumys isteıtinder úshin zeınet jasyn 55 jasqa deıin tómendetý týraly zań osy jyldyń 1 qańtarynan bastap kúshine engeni belgili. Bul rette qyzmetkerge zeınetkerlikke shyǵý nemese jumys baǵytyn ózgertip, jeńil jumysqa kóshý múmkindigi beriledi. Májilis Vıtse-spıkeri Albert Raý aýyr júk kólikteriniń júrgizýshilerine arnaıy áleýmettik tólem alý quqyǵyn qamtamasyz etý boıynsha atqarylǵan jumystar týraly eńbek ujymyn habardar etti.
– Merziminen buryn zeınetke shyǵý máselesi bizdiń partııanyń saılaýaldy baǵdarlamasyndaǵy basty máseleniń biri boldy, Prezıdent zańǵa ótken jyldyń sońynda qol qoıdy. Sizder «AMANAT» partııasyna senim bildirdińizder, al biz óz ýádelerimizdi oryndap jatyrmyz. Bıylǵy jartyjyldyqta men salalyq vedomstvolarmen kezdesýler ótkizdim, elimizdegi karerlik aýyr júk kólikteri júrgizýshileriniń sanyn eseptep, árqaısysynyń jumys saǵatyn sanadyq. Zań bar, endi Eńbek mınıstrliginiń buıryǵy qajet, bul bıýdjet qarajatyn jumsaýǵa ákeledi. Sondyqtan qazir respýblıkalyq bıýdjettik komıssııanyń kelisimin alý úshin esepteýler júrgizilýde, biraq qazirdiń ózinde máseleniń oń sheshilgenin aıtýǵa bolady. Mysaly, qazir elimiz boıynsha shamamen 8 myń adam arnaıy áleýmettik tólemder alyp otyr, – dedi Albert Raý.
Májilis Tóraǵasynyń orynbasary jańa Bıýdjet kodeksi jobasy týraly da aıtyp berdi. Depýtattar árbir eldi mekende jeke tabys salyǵynyń tolyq kólemi, sondaı-aq shaǵyn bıznesten túsetin paıda salyǵy osy eldi mekenniń bıýdjetinde qalatyndaı túzetýlerdi maquldady. Osylaısha, bul qarajatty belgili bir qala nemese aýyldyń qajettilikterine, jergilikti bılik pen máslıhat depýtattarynyń sheshimimen paıdalanýǵa bolady.
Sonymen qatar kezdesýge qatysýshylar jergilikti ınjenerlik jáne kommýnaldyq ınfraqurylymdy damytý máselelerin talqylady.
– Qalalarǵa arnalǵan bizdiń saılaýaldy baǵdarlamamyzdyń negizgi tarmaqtarynyń biri – kommýnaldyq ınfraqurylym. Rýdnyıda ótken jyly jylý jelilerin rekonstrýktsııalaýǵa alǵashqy 4 mlrd teńge bólindi. Bıyl da sol jumys shamamen 3-4 mlrd teńgege jalǵasýda, onyń ishinde qalalyq jelilerdi jóndeý jumystary bar. Sondaı-aq jyl sońyna deıin aınalma jol men kópir salýǵa tender jarııalanady», – dep atap ótti depýtat.
Kezdesý barysynda Albert Raý jınalǵandarǵa Májilis depýtattarynyń ótken sessııada atqarǵan jumysy, Prezıdenttiń «Ulttyq qor – balalarǵa» bastamasyn júzege asyrý, qumar oıyndarǵa qarsy kúres týraly qabyldanǵan zań jáne qarjylyq alaıaqtarǵa qarsy is-qımyl týraly aıtyp berdi.