Taý bókterindegi qurylysqa baqylaýdy kúsheıtemiz - Dosaev Almatydaǵy kóshkin týraly
Shahar basshysy qaıtys bolǵan otbasynyń týystaryna kóńil aıtyp, jaqyndaryna qandaı qoldaý kórsetiletinin jetkizdi.
«Taý Samaly» shaǵyn aýdanynda qaza tapqan otbasynyń qarjylyq mindettemesi óteledi. Ákimdik jerleýdi uıymdastyrý men eske alý is-sharalaryn ótkizý boıynsha barlyq qajetti kómek kórsetedi. Bul otbasynyń shetelde oqıtyn úlken uly Dmıtrıı Shınniń oqýyna qarjylaı qoldaý kórsetiledi, sonymen qatar, ata-anasynyń qarjylyq mindettemesin sheshýge járdemdesedi», - dedi Erbolat Dosaev Medeý aýdanynyń turǵyndarymen kezdesý barysynda.
Qala basshysy ákimdik Almaty taý bókterindegi qurylysty baqylaýdy kúsheıtý boıynsha keshendi jumys júrgizip jatqanyn jáne «Taý Samaly» shaǵyn aýdanyndaǵy qaıǵyly oqıǵa tıisti sharalardy kúsheıtý qajettigin dáleldegenin erekshe atady.
Máselen, 2022 jyldyń maýsym aıynda máslıhat 15 gradýstan asatyn taýly betkeılerdegi qurylysqa tyıym salýdy usynyp, qoldaǵan bolatyn.
«Osy norma qabyldanǵan sátten bastap taýly jerlerde zańsyz qurylystyń anyqtalǵan 54 faktiden sottarǵa 45 talap-aryz berildi, onyń 31-i qalanyń paıdasyna sheshildi, 4-ýi qarastyrylýda. Qalǵan 9-y boıynsha eskertýler joıyldy nemese qurylys-montaj jumystary toqtatyldy jáne sotqa talap-aryzdar daıyndalýda», - dedi Erbolat Dosaev.
Bul baǵyttaǵy jumys jalǵasady. Qazir Almatynyń 2040 jylǵa deıingi Bas josparyna tolyq sáıkes keletin jáne qala aýmaqtaryn qurylys úshin ártúrli talaby bar aımaqtarǵa bóletin egjeı-tegjeıli josparlaýdyń jańa jobalary bekitildi.
Esterińizge sala keteıik, 8 aqpanda Medeý aýdanynyń «Taý Samaly» shaǵyn aýdanyndaǵy Olımpıskıı kóshesi boıynda tehnogendik sıpattaǵy topyraqtyń laılanýy saldarynan laı kóshkini boldy.
Keıin Almaty qalasy Tótenshe jaǵdaılar departamenti men Respýblıkalyq jedel-qutqarý jasaǵynyń kúshteri úıindi astynan tórt adamnyń denesin tapty.
Olardyń barlyǵy bir otbasynyń múshesi - 1984 jyly týǵan er adam, 1980 jyly týǵan áıel jáne 2007 jylǵy egiz jasóspirim ul balalar.