Taý arqaryn soıyp alǵan túrkistandyq qoıshy tergeýge alyndy
Kúdiktini Báıdibek aýdandyq polıtsııa bóliminiń qyzmetkerleri ekologııalyq qylmystardyń aldyn alý baǵytyndaǵy «Brakoner» jedel-profılaktıkalyq is-sharasy barysynda ustaǵan.
Tabıǵatty qorǵaý tobynyń ınspektory, polıtsııa kapıtany Almas Serikov kúndelikti jumysyn atqarý kezinde taýly aımaqta salt attyny baıqap, ony toqtatyp, ne maqsatpen júrgenin surastyrady. Turǵynnyń kúmán týdyrǵan qabynan jańa soıylǵan ań ushasy tabylyp, tárkilenedi. Saraptama taǵaıyndalady.
Kúdikti jaýap berý barysynda qaptaǵy ettiń arqardiki ekenin, ony ustaǵan kezin óz uıaly telefonyna túsirip alǵanyn jetkizedi. Anyqtalǵandaı, mal baǵyp júrgen jas jigit janýardy ıtteriniń kómegimen ustap alǵan.
Atalǵan jaıt QR QK-niń 339-baby «Sırek kezdesetin jáne quryp ketý qaýpi tóngen, sondaı-aq paıdalanýǵa tyıym salynǵan ósimdikter men janýarlar túrlerin, olardyń bólikterin nemese derıvattaryn zańsyz paıdalaný» boıynsha tirkeýge alynyp, sotqa deıingi tergeý amaldary júrgizilip jatyr.
Foto: polisia.kz