Tatarstanda Altyn Orda tarıhy týraly telehıkaıa túsiriledi
08:15, 01 Qarasha 2015
ASTANA. QazAqparat - 2016 jyldyń qyrkúıek-jeltoqsan aılarynda Tatarstanda Altyn Orda týraly telehıkaıa túsiriledi, dep habarlanǵan "Nur Astana" meshitiniń saıtynda.
Kınotýyndyda Sholpan Hamatova, Renata Lıtvınova, Marat Basharov, Fedor Bondarchýk, Artýr Smolıanınov, Elızaveta Boıarskaıa, Marııa Mıronova, Irına Pegova, Aleksandr Balýev, Evgenıı Tsyganov, sondaı-aq Irına Sheık jáne «Golos» shoýynyń alǵashqy maýsymynyń jeńimpazy Dına Garıpova tarıhı rólderdi somdamaq. 16 bólimnen turatyn jobanyń ár serııasynyń bıýdjeti 25 mln rýbldi quraıdy. Barlyq túsirilimge 400 mln rýbl jumsalmaq. Daıyndyq jumystary aldaǵy jyldan bastalyp, negizgi túsirilim qyrkúıek-jeltoqsan aılarynda júrgiziledi. Teletýyndy kórermen nazaryna Reseı «Birinshi arnasynan» 2017 jyldyń kúz-qys maýsymynda usynylady. Altyn Orda tarıhynan syr shertetin telehıkaıanyń 70 paıyzyn Tatarstannyń kórikti jerlerinde túsirý josparlanǵan.