«Tatar-ınform» aqparat agenttiginiń qurylǵanyna 30 jyl toldy
Agenttikti qurý jónindegi buıryqqa 1990 jyldyń 6 maýsymynda Tatarstannyń birinshi prezıdenti Mıntımer Shaımıev qol qoıǵan bolatyn. Osylaısha «Tatar-ınform» - Keńes Odaǵy men Reseı Federatsııasy aýmaǵyndaǵy óz kúshimen ashylǵan alǵashqy aqparat agenttigi boldy.
Qazirgi tańda TI saıtynda kúnine orys tilinde - 250, tatar tilinde 60 jańalyq taratylady. Sonymen birge «Tatar-ınform» ózindik vıdeo jáne aýdıokontentti de shyǵaryp otyr.
Agenttikke aıyna shamamen 1,5 mln adam kirip, jańalyqtardy qarap, ózine qajetti málimetterdi ala alady.
«Tatar-ınform» qazaqstandyq «QazAqparat» Halyqaralyq aqparat agenttigimen seriktese jumys júrgizetin agenttiktiń biri. 2018 jyldyń qyrkúıeginde Qazaqstan Respýblıkasy men Reseı Federatsııasy arasyndaǵy yntymaqtastyq týraly Úkimetaralyq komıssııanyń otyrysynda «QazAqparat» halyqaralyq aqparat agenttigi men «Tatar-ınform» aqparat agenttigi yntymaqtastyq týraly memorandýmǵa qol qoıdy. Memlekettik aqparat agenttikteriniń qujatqa qol qoıý rásimi Tatarstan astanasyndaǵy Qazan ratýshasynda ótti. Memorandýmǵa «QazAqparat» HAA Bas dırektory Asqar Ýmarov pen «Tatar-ınform» AA Bas dırektory Shámil Sadyqov qol qoıǵan bolatyn.
Qos agenttik jańalyq almasyp qana qoımaı, rýhanı yntymaqtastyqta da bir-birine qoldaý kórsetip keledi. Máselen Uly Abaıdyń 175 jyldyǵyna arnalǵan estafetany byltyr «Tatar-ınform» ujymy qurmetpen qabyl alǵan bolatyn. «Tatar-ınform» ujymy Abaıdyń óleńin oqyp, fleshmobqa agenttiktiń bas redaktory Rámıs Latyıpov, tilshiler Dıná Iosypova men Alıná Aıdarova jáne lenta redaktory Gólfııa Gobáıdýllına qatysqan edi. Sondaı-aq vıdeoblog avtory Ilgız Shákúrov te bar. «Tatar-ınform» ókilderi #abai175 fleshmoby estafetasyn TNV – «ıAńa gasyr» teleradıokompanııasyna jáne «Bolgar radıosyna» tapsyrǵan.
30 jyldyqqa oraı «QazAqparat» agenttigi «Tatar-ınform» agenttigi ujymynyń eńbegine jemis tileıdi. Agenttikterimiz túbi bir túrkitildes eki eldiń týystyǵyn nyǵaıta bersin.