«Tatamı tarlandary Alataý baýraıynda bas qosady» - respýblıkalyq basylymdarǵa sholý
***
Keshe Memleket basshysy Nursultan Nazarbaev Soltústik Qazaqstan oblysyna jumys saparymen keldi. Sapar barysynda egis tanaptaryn, sharýashylyqtardy aralap, mal sharýashylyǵyn damytý baǵdarlamasynyń oryndalý jaıymen tanysty. Osyǵan oraı «Egemen Qazaqstan» gazetinde «Merekeli jyldyń berekeli astyǵy» degen taqyryppen kólemdi maqala jarııalandy. «Merekeli jyldyń astyǵy berekeli bolǵaly tur. Alǵashqy nátıjeler qýantarlyq. Gektar ónimdiligi 18,5-19 tsentnerden aınalýda. Aıyrtaý, Taıynsha, Músirepov, Aqjar aýdandarynyń kórsetkishteri 20-dan asyp jyǵylady. Qazaqstannyń Eńbek Eri Gennadıı Zenchenko sekildi túsimdi 25-30 tsentnerge jetkizgender qatary kún sanap kóbeıip keledi. Soǵan qaraǵanda, oblys boıynsha 6,5-7 mıllıon tonna astyq jınalady dep boljanýda», - dep jazady basylym.
«Keshe Parlament Májilisinde Din isteri jónindegi agenttik tóraǵasy Qaırat Lama Sharıf «Din isteri jáne dinı birlestikter týraly» jańa zań jobasyn tanystyryp, tusaýkeserin jasady», - dep jazady «Egemen Qazaqstan» gazeti «Din isteri zańnamasyn jetildirý - ómir talaby» degen taqyryptaǵy maqalasynda. Basylymnyń atap ótýinshe, dinı senim-nanym bostandyǵy zań jobasynda úsh negizgi qaǵıdatqa súıenedi. Olar - beıtaraptyq, toleranttylyq jáne teńdik. Zań jobasy boıynsha dinı birlestikter 18 jasqa tolǵan azamattardyń bastamasymen qurylady. Budan 18-ge tolmaǵan jastyń dinı birlestikke múshe bolýǵa quqy joq degen uǵym týady. Zań jobasy dinı birlestikterdiń qaı konfessııaǵa jatatyndyǵyn kórsetpeı, jalpylama ataýmen tirkelýine de jol bermeıtini belgili boldy.
***
24-25 qyrkúıek aralyǵynda Almatyda dzıýdodan Álem kýbogy kezeńi ótedi. Atalǵan básekeniń máni men mańyzy zor, mártebesi asqaq ekenin kópshilik jaqsy biledi. Sol sebepti de qatysýshy memleketter ózderiniń barlyq beldi balýandaryn jarys jolyna shyǵarýdy jón sanaıdy. Mine, osyndaı mártebeli doda Almatyda ótedi dep josparlandy. Alataý baýraıynda ornalasqan ásem qalaǵa taıaý kúnderi tórtkúl dúnıeniń teńdessiz tatamı sheberleri keledi. Osynaý baıraqty básekede el namysyn qorǵaıtyn sportshylarymyz jaıynda keńinen maǵlumat alǵyńyz kelse «Aıqyn» gazetiniń juma kúngi sanyndaǵy «Tatamı tarlandary Alataý baýraıynda bas qosady» degen maqalaǵa nazar salyńyz.
Jaqynda Qazaqstan tarıhshylarynyń eń joǵarǵy forýmy - tuńǵysh kongresi ótpek. Árıne, onyń kerekti is ekendigine esh kúmán joq. Biraq kongress qalaı ótedi, ne beredi, qabyldanǵan sheshimder tarıh ǵylymynyń damýyna qalaı áser etedi? Kongress ǵylymǵa tıgizgen paıdasy shamaly «ǵylymı konferentsııalar» sııaqty óte me, joq álde onda búgingi Qazaqstan tarıh ǵylymynyń naqty jaǵdaıyna taldaý jasalynyp, ondaǵan jyldar boıy qordalanǵan máselelerdiń sheshilý joldary izdestirile me? Mine osy saýaldardy «Aıqyn» gazeti tarıh ǵylymdarynyń doktory, ál-Farabı atyndaǵy Qazaq ulttyq ýnıversıtetiniń professory Qambar Atabaevqa qoıyp, tuşymdy jaýap alǵan. Ǵalym jaýaptary «Qazaqstan tarıhshylarynyń tuńǵysh kongresi ne beredi?» degen taqyryp aıasynda berilgen.
***
«Alash aınasy» gazetiniń turaqty «Dat!» aıdarynda qazaq fýtbolynyń ardageri Tımýr Segizbaevpen aradaǵy suhbat «Táýelsizdik alǵanymyzǵa 20 jyl tolady, al salǵanymyz bir-aq stadıon» degen taqyryppen berilgen. Basylym tilshisiniń barlyq saýaldaryna egjeı-tegjeıli jaýap bergen ol: «Kelisimshart júıesi qalyptasqan, biraq bapkerlerde lıtsenzııa joq. Barlyq komandalardyń izbasar tárbıeleý isi kóńildegideı dep aıta almaımyz. Eń ókinishtisi, qazir jergilikti bapkerlerge qoldaý kórsetilmeıdi. Aqsha tólep, shetten shaqyramyz. Ózimizdiń mamandar kóleńkede qaldy», - deıdi.
Búgingi tańda elimizde densaýlyq saqtaýdyń biryńǵaı ulttyq júıesin engizý boıynsha biraz is-shara atqarylǵanymen, osy salada kásibı tájirıbe áli jetispeı jatqan sııaqty. Osyǵan oraı, Elbasy Nursultan Nazarbaevtyń tapsyrmasy boıynsha Qazaqstanda «Bolashaq gospıtali» bastamasy qolǵa alyndy. Densaýlyq saqtaý júıesin tıimdi basqarý salasyndaǵy álemniń ozyq tájirıbesi men ınnovatsııalyq áleýetin tartyp, otandyq medıtsınany jańasha damytatyn «Bolashaq gospıtali» Astanadaǵy Ulttyq medıtsınalyq holdıngi negizinde jumys isteıtin bolady. Osynaý ıgi bastamaǵa Astanada bastalǵan ІІ Halyqaralyq medıtsınalyq isker forýmynyń jumysy arnaldy. Bul jaıynda «Alash aınasy» gazetiniń búgingi sanyndaǵy «Bolashaq gospıtali» Astanada ornalasady» degen maqaladan egjeı-tegjeıli bile alasyzdar.
***
«Syrtqy ister mınıstri Erjan Qazyhanov Reseıdiń syrtqy saıasat vedomstvosynyń basshysy Sergeı Lavrovqa «Lokomotıv» HK oıynshylary men ıAK-42 ushaǵy ekıpajynyń apatqa ushyraýyna baılanysty kóńil aıtyp, jedelhat joldady», - dep jazady «Kazahstanskaıa pravda» gazeti. «Lokomotıv» hokkeı klýbynyń músheleri men ekıpajdyń qazasyna alyp kelgen ıAK-42 ushaǵynyń apatqa ushyraǵan habaryn asa kúızele otyryp estidim. Men qaıǵyǵa ortaqtasyp, qaza tapqandardyń otbasylaryna, týǵan-týysqandary men jaqyndaryna kóńil aıtamyn», - delingen jedelhatta.