Taspıhov shtaby kitaphana ujymyna saılaýaldy baǵdarlamasyn tanystyrdy

ShYMKENT. QazAqparat - Shymkentte saılaý kúni taıaǵan saıyn úgit-nasıhat jumystary da qyza tústi. Kandıdat Amankeldi Taspıhovtyń Túrkistan oblysy jáne Shymkent qalasy boıynsha aımaqtyq shtabynyń músheleri men senimdi ókilderi kitaphana qyzmetkerlerimen kezdesti. Bul týraly QR Kásipodaqtar federatsııasynyń baspasóz qyzmeti habarlady.

Shymkent qalalyq kózi kórmeıtin jáne álsiz kóretin azamattarǵa arnalǵan arnaıy kitaphana eńbek ujymymen ótken jıynǵa 40 adam qatysty. Sondaı-aq, Túrkistan oblystyq sport, aqparat jáne mádenıet kásipodaqtar uıymynyń tóraǵasy Bastarbek Pirimbetov ujymǵa Amankeldi Taspıhovtyń ómiri men eńbek joly týraly aıtyp, saılaýaldy tuǵyrnamasyn tanystyryp ótti.

Qaýipsiz eńbek jaǵdaıy, jaýapsyz jumys berýshilerdiń jaýapkershiligin arttyrý boıynsha úmitker usynystary ortaǵa salyndy. Tuǵyrnamaǵa súıene kele úmitkerdiń senimdi ókili Bastarbek Pirimbetov eńbek adamdaryna laıyqty eńbekaqy tólenýmen birge olar úshin qaýipsiz eńbek jaǵdaıyn jasaý óte mańyzdy shart. Óıtkeni, adam ómiri men densaýlyǵynan artyq eshteńe joq.

Sondaı-aq, belsendiler aldaǵy saılaýdyń el bolashaǵy úshin óte mańyzdy ekenin eskerip, biraýyzdan saılaýdan tys qalmaı qatysýǵa shaqyrdy.

Kitaphanashylar tarapynan túsken saýaldar da az bolmady. Kitaphanashy Nazgúl Espanova elimizdegi bilim men medıtsına salasyn jańa satyǵa kóterýge qatysty saýal joldady. Kitaphana qyzmetkeri Altynaı Ýmırova áıelder úshin zeınet jasyn qysqartý jóninde suraq qoıdy. Belsendi top bul qoıylǵan suraqtardyń oryndy ekenin aıtyp, usynystardyń kandıdat qaraýyna joldanatynyn jetkizdi.