Tasmaǵambetov balalar úıleri tárbıelenýshileriniń sanyn azaıtý boıynsha jumysty belsendi júrgizýdi tapsyrdy

ASTANA. QazAqparat - Búgin QR Premer-Mınıstriniń orynbasary Imanǵalı Tasmaǵambetovtiń tóraǵalyǵymen balalar úıleri tárbıelenýshileriniń sanyn azaıtý jóninde májilis ótti. Atalǵan keńeske QR Parlamenti Májilisiniń depýtattary, QR bala quqyqtary jónindegi ýákil Zaǵıpa Balıeva, QR Bilim jáne ǵylym mınıstri Erlan Saǵadıev, sondaı-aq, ortalyq atqarýshy organdardyń, úkimettik emes jáne kommertsııalyq uıymdardyń ókilderi qatysty.

Májilis barysynda jetim balalar men ata-anasynyń qaraýynsyz qalǵan balalardyń jáne óz otbasyna bala asyrap alýǵa nıet bildirgen tulǵalardyń aqparattyq málimetter bazasyn qurý máselesi kóterildi.

«Ózderińizge málim, Memleket basshysy memlekettik organdarǵa balalar úılerinde tárbıelenip jatqandardyń sanyn azaıtý týraly tapsyrma bergen bolatyn. Bul baǵytta memlekettik organdar tarapynan josparly jáne dáıekti jumys júrgizilýde. Balalardy otbasyna ornalastyrýdyń balamaly formalary kóbeıip, asyrap alý, qamqorlyqqa alý, patronattan ózge, 2017 jyldan bastap qabyldaý jáne qonaqjaı otbasylary formasy enedi. Bulardyń barlyǵy memleket tarapynan materıaldyq qoldaýǵa ıe bolady», - dedi májilis barysynda Imanǵalı Tasmaǵambetov.

Sonymen qatar, ol bul jumysqa úkimettik emes uıym ókilderi tartylatyndyǵyn atady. Olar zańnama aıasynda qoǵamdyq uıym retinde balalar úıleriniń qyzmetkerlerin oqytý, tárbıelenýshilerdiń arasyndaǵy syrqattardy anyqtaý jáne taǵy basqa jumystardy júrgizedi. Vıtse-premer osyndaı uıymdardyń biri retinde «Bala asyrap alýdy qoldaý ortalyǵy» jobasyn iske asyrýshy «Ana úıi» qoǵamdyq qoryn erekshe atady.

Talqylaý barysynda QR Bilim jáne ǵylym mınıstri Erlan Saǵadıev bala asyrap alýdyń ashyqtyǵy men qol jetimdiligin qamtamasyz etý maqsatynda aǵymdaǵy jyldyń sáýir aıynan beri jetim balalar men ata-anasynyń qaraýynsyz qalǵan balalardyń jáne óz otbasyna bala asyrap alýǵa nıet bildirgen tulǵalardyń Respýblıkalyq málimetter banki qalyptasqanyn aıtty.

Sońǵy málimetter boıynsha jyl saıyn alty myńnan asa bala Jasóspirimderdi beıimdeý ortalyqtary arqyly asyrap alýǵa, qamqorlyqqa jáne patronattyq tárbıege beriledi. Sonymen qatar, týǵan ata-analaryna qaıtarylady nemese jetimder men ata-anasynyń qorǵaýynsyz qalǵan balalarǵa arnalǵan mekemelerge jiberiledi. Sondaı-aq, jańa týǵan nárestelerdiń ata-anasy anyqtalmaǵan jaǵdaıda, jergilikti atqarýshy organdardyń qorǵanshy jáne qamqorshy organdary sábılerdi birden otbasylaryna tárbıege bere alady.

«Barlyq quzyrly memlekettik organdar balalardy asyrap alýǵa, patronattyq tárbıege jáne otbasylaryna berý arqyly jetim balalar úılerindegi tárbıelenýshilerdiń sanyn qysqartý úshin belsendi jumys júrgizýi qajet», - dep túıindedi vıtse-premer Imanǵalı Tasmaǵambetov.

Sonymen qatar, májilis qorytyndysynda vıtse-premer jaýapty qurylymdarǵa Bala quqyqtary jónindegi ýákilmen jáne úkimettik emes uıymdarmen birlesip jetim balalardy qazaqstandyq azamattardyń otbsayna tárbıeleýge berýde úkimettik emes uıymdardyń qatysýy bóliginde zańanamany jetildirý boıynsha usynystar ázirleýdi tapsyrdy.