Tasqynnan zardap shekken Shemonaıha turǵyndaryna baspana berildi
«Nur Otan» partııasy oblystyq fılıalynyń baspasóz qyzmetiniń habarlaýynsha, úıi jaramsyz 12 otbasy jańa páterge ıe bolǵan. Páter kiltterin partııa fılıaly tóraǵasynyń birinshi orynbasary Ánýarbek Muhtarhanov tabystady. Halyqtyń kópten kútken qýanyshyna Astanadan da meımandar qatysyp, baspanaly bolǵan otbasylarǵa syılyq usyndy.
«Meniń úıim sý astynda qalyp qoıǵan. Іrgetasy úsh jerden jarylyp ketti. Sol kezdegi jaǵdaıymdy kórseńizder ǵoı. Qoryqqanymyz sonshalyqty, biraz ýaqytqa deıin es jınaı almadyq. Buryn tek teledıdardan kóretin jaǵdaıdyń basyma keletinin oılamaǵan da edim. Al búgin 4 bólmeli aǵash úıge qonys aýdaryp otyrmyz. Jańa baspanamyz berekeli bolady degen úmit bar», - deıdi Lıýdmıla Degtıareva esimdi turǵyn.
Saltanatty jıynda jańa baspananyń kiltin alǵan Lıýdmıla ómirimniń jańa paraǵy osynda bastalady degen senimde. Sebebi, aǵashtan soǵylǵan tórt bólmeli úıdiń boı kótergen jyly da jańa, jaǵdaıy da burynǵy baspanasynan edáýir jaqsy.
Bul otbasy jańa baspanany ózderine ıkemdep alý úshin, jeńil jóndeý jumystaryn júrgizbekshi.
«Esikterin aýystyryp, as úıge kafel tóseımiz. Memleketten dál mundaı kómek bolady-aý dep kútpep edik», - deıdi Lıýdmıla.
Baspanasy jaramsyz bolǵan 12 otbasydan bólek kóp balaly januıalarǵa da jomart jandar tarapynan kómek kórsetildi. Atap aıtqanda, "Memlekettik qyzmet kórsetý salasyndaǵy qyzmetkerlerdiń jergilikti kásiptik odaǵy" qoǵamdyq birlestiginiń tóraǵasy Astanadan arnaıy kelip, qorap-qorap turmystyq tehnıkalardy tartý etti.
«Bizdiń ujym «Nur Otan» partııasynan túsken úndeýge bir kisideı atsalysty. Barlyǵy 2 mln teńge qarajat jınaldy. Búgin 18 tońazytqysh, 7 kir jýatyn mashına, 8 teledıdar alyp keldik» - deıdi birlestik tóraǵasy Qorǵanbek Nurpeıisov.
Sý alǵan ózge úılerde qazir jóndeý jumystary qyzý júrip jatyr. Onyń barysy «Nur Otan» partııasynyń baqylaýynda.
«Aýdanda jóndeý jumystary qyzý júrip jatyr. Tamyzdyń aıaǵyna deıin 126 úıdegi jóndeý tolyq aıaqtalady. Qurylǵan qorda qarajat bar. Aýdandyq ákimdiktiń aldyna qoıylǵan mindet bar. Ol fılıal tóraǵasy, oblys ákimi Danıal Ahmetovtiń tikeleı baqylaýynda. Sondyqtan tasqynnan zardap shekken halyqtyń qalypty turmysyn qaıtarý kún tártibindegi basty másele», - dedi Ánýarbek Muhtarhanov.
Jalpy tasqynnan Shemonaıha aýdanynyń birneshe eldi mekeni zardap shekken bolatyn. Saldarynan 152 úıge sý kirip, onyń 13 turýǵa jaramsyz dep tanyldy. Arnaıy komıssııamen 134 úıge jóndeý jumystaryn júrgizý týraly sheshim qabyldandy. Úkimet sheshimine saı, respýblıkalyq bıýdjetten 168 mln teńge qarajat bólindi. Sonymen qatar, oblystyq «Paryz» qorynan 50 mln teńge qarastyryldy.