Tasqynnan zardap shekken maqtaaraldyqtarǵa qoǵamdyq uıymdar gýmanıtarlyq kómek jetkizýde

MAQTAARAL. QazAqparat - Tasqynnan zardap shekken maqtaaraldyqtarǵa qoǵamdyq uıymdar da gýmanıtarlyq kómek jetkizýde. Túrli apattar kezinde azamattarǵa kómek kórsetetin «Qyzyl Jarty Aı» qoǵamy baspanasyz qalǵan otbasylarǵa azyq-túlikter men kıim-keshekter taratýda, dep habarlaıdy QazAqparat tilshisi.

Atalǵan qordyń oblystyq fılıalynyń dırektory Malıka Júnisovanyń aıtýynsha, uıym ókilderi men eriktiler tasqyn bolǵan alǵashqy kúnnen bastap óz kómekterin kórsetip keledi. Turǵyndardy evakýatsııalyq ortalyqtarǵa kóshirý men olardyń zattaryn tasymaldaý sharalaryna atsalysqan. Sondaı-aq, mektepter men týystarynyń úıine jaıǵasqan otbasylarǵa qajetti zattar tizimi jasaqtalyp, olar da der kezinde jetkizilip berilýde.

«Apat bolǵan aımaqta 300 otbasyǵa alǵashqy kómek retinde azyq-túlikter men gıgıenalyq zattar jetkizilip berildi. Onyń ishinde kórpe-tósek pen azyq-túlikter, gıgıenalyq zattar men balalarǵa arnalǵan taǵamdar bar. Bizdiń eriktiler únemi zardap shekken turǵyndarmen baılanysyp, qajet degen zattarymen qamtamasyz etýde. Kúni búginge deıin 70 myńnan asa medıtsınalyq betperde taratylyp, jekelegen azamattar men januıalarǵa psıhologııalyq qoldaý kórsetýdemiz»,- deıdi Malıka Júnisova.