Tasqynnan japa shekken halyqqa shoý-bıznes juldyzdary qandaı kómek berip jatyr

<p>ASTANA. KAZINFORM — El basyna kún týǵanda halyq jurt aldynda júrgen tanymal tulǵalardy izdeı bastaıdy. Solardyń bir aýyz jyly sózi, kómegi qınalǵan jurtqa jiger bolary sózsiz.</p>

Áleýmettik jelide «Ánsheıinde halqym, elim-jurtym dep emirenip júretin ánshiler qaıda? Halqynyń qasynan tabylyp, nege eldi kómekke jumyldyrmaıdy?» degen synı pikirler kóp jazylyp jatyr.

Árıne osyndaı syn saǵatta tanymal tulǵalar el aldyna shyǵyp, eldi sabyrǵa, aýyzbirshilikke shaqyryp, qaırymdylyq sharalar uıymdastyrsa nur ústine nur bolar edi. Óıtkeni juldyzdardyń, tanymal tulǵalardyń sózi ótimdi bolatyny ras.

Eldiń eńsesin ezgen sý apatyna múmkindiginshe atsalysyp kómek atap jatqan óner ókilderi de joq emes. Búgin aıtysker aqyn Aınur Tursynbaeva sýdan zardap shekken óńir turǵyndaryna qarjylaı kómek atady.

Bul týraly aıtysker áleýmettik jelidegi paraqshasynda jazdy.

— Topan sý basyp jatqan aımaqtardaǵy halyqtyń jaǵdaıyna alańdap otyrmyz. Bizdiń kúshimiz birlikte! Bul qıyndyqtan da aman ótemiz. Prezıdentimiz barlyq shyǵyn óteletinin aıtyp jatyr. Azamattar aman bolsa osy jerlerde keremet qalashyqtar boı kóterip, arty toı bolatynyna senemiz. Otbasymyzdyń atynan 5 mıllıon qarjy berip jatyrmyz. Alla qalasa balalar kıimderi, pampers, taǵy basqa kerek-jaraqty alyp ár aımaqqa teńdeı bólip taratamyz. Elimizge Alla jar bolsyn! — dep jazdy ol.

Tanymal ánshi Mádına Sádýaqasova tasqyn sýdan zardap shekkenderge 1 mln teńge qarjylaı kómek berip, eldi sabyrǵa shaqyrdy.

Ol kómegin ári qaraı da jalǵastyratynyn aıtty.

— Elimizde bundaı tabıǵı apat buryn-sońdy bolmaǵan. Mundaı qıyn kezeńderde bir-birimizge qol ushyn berip, demeý bolaıyq. Sýǵa ketken óńirlerde qutqarý jumysyn júrgizip jatqan azamattarǵa myń alǵys! Gýmanıtarlyq, qarjylaı kómek kórsetip jandarǵa Alla razy bolsyn. Bizdiń otbasy da óz úlesin qosyp, Kaspı bank arqyly 1 mln teńge aýdardyq! Bul tek bastamasy, qolymnan kelgenshe, álde de kómek berýdi toqtatpaımyn, jalǵastyramyn. Allam Qazaqstannyń ár óńirin tabıǵı apatynan saqtasyn, — dep jazdy ánshi.

Sondaı-aq jaqynda áleýmettik jelide, ánshi Tóreǵalı Tóreáli, Nurbolat Abdýllın jáne basqa da shoý bıznes ókilderiniń sý apatynan zardap shekken halyqqa qarjylaı kómek atap jatqan vıdeo taraǵan edi.

@toregalitoreali_kz #UDB #TTT ♬ orıgınalnyı zvýk — Tóreǵalı Tóreali