Tasqynnan zardap shekken aımaqtardaǵy balalar jazǵy belsendi demalyspen qamtylady

<p>ASTANA. KAZINFORM &ndash; Aımaqtarda balalardyń jazǵy demalysyn uıymdastyrý sharalary aıaqtaldy. Bul týraly QR Premer-Mınıstriniń orynbasary Tamara Dúısenovanyń tóraǵalyǵymen ótken keńesterde oblys ákimderiniń orynbasarlary baıandady.</p>

Bıyl 3 mln-nan asa balany belsendi jazǵy demalyspen qamtý josparlanǵan. Oqýshylar úshin 10 myńnan asa lager qyzmet kórsetpek. Balalarǵa demalystan bólek jas erekshelikterine qaraı túrli tanymdyq sharalardyń uıymdastyrylýy bıylǵy jaz mezgiliniń basty ózgesheligi bolmaq.

Bastaýysh synyp oqýshylarynyń jan-jaqty damýy úshin mektep janyndaǵy lagerler jumys istemek. Odan bólek, ár túrli tanymdyq sharalar qarastyrylyp otyr. Máselen, Atyraý oblysynda «Kids university» jobasy sheńberinde balalar ýaqytsha «stýdenttik bılet» alyp, birneshe kún erekshe sabaqtar arqyly ǵylym álemine boılamaq.

Orta synyp oqýshylaryna ekskýrsııalyq-týrıstik baǵdarlamalar usynylatyn bolady. Balalar týǵan ólkesiniń tarıhı, mádenı muralarymen tanysý múmkindigine ıe bolady.

Mysaly, Soltústik Qazaqstan oblysy aýyl mektepteriniń oqýshylary úshin Petropavl qalasyna saparlary uıymdastyrylady. Munda olarǵa shahardyń kórneki oryndary kórsetilip, tarıhı eskertkishter men murajaılarǵa tanymdyq saıahattar qarastyrylady.

Shyǵys Qazaqstan óńirinde balalarǵa «Qonaqjaı otbasy» jobasy usynylady. Onyń aıasynda nıet bildirgender qazaq tilin meńgerýge jáne aımaqtyń ásem tabıǵaty men mádenıetimen tanysýǵa múmkindik alady. Jobaǵa qatysýshylar 20 kún boıy aýyldyq eldi mekenderdegi otbasylarda turatyn bolady.

Joǵary synyp oqýshylary úshin kolledj ben joǵary oqý oryndary bazasynda mamandandyrý baǵytyndaǵy birqatar shara júzege asyrylady.

Oqý-aǵartý mınıstrliginiń dereginshe, áleýmettik jaǵynan az qamtylǵan otbasylardan shyqqan balalardyń 94%-y qamtylatyn bolady.

Sý tasqyny saldarynan zardap shekken aımaqtardyń balalary erekshe nazarda bolady. Tasqyn bastalǵan kezden bastap 614 bala oqý-saýyqtyrý ortalyqtarynda bolǵan. Qazirgi tańda ol nysandarda 629 bala demalyp jatyr. Jazǵy demalys kezinde 3 833 balany demalys jáne saýyqtyrý sharalarymen qamtý josparlanǵan.

«Oqý-aǵartý mınıstrligi aımaqtardaǵy oń tájirıbelerdiń keńinen taralýyn qolǵa alýy tıis. Sharalardy uıymdastyrý kezinde balalardyń qaýipsizdigine basa mán berilgeni jón. Búginde demalys, saýyqtyrý oryndaryn tekserý jáne qabyldaý kestesi bekitilgen. Onyń saqtalýyn múddeli memlekettik organdar men óńir ákimdikteri turaqty baqylaýda ustaýy qajet», — dep atap ótti Tamara Dúısenova.