Tasqynnan qutqarylǵan 6,5 myń adam áli evakýatsııa pýnktin panalap otyr

<p>ASTANA. KAZINFORM — Tótenshe jaǵdaılar mınıstri Shyńǵys Árinov «Biz birgemiz» jalpyulttyq telekópirinde tasqyn saldarynan úıin tastap shyqqan adamdardyń ahýalyna toqtaldy.</p>

«Qazirgi tańda 119 myńǵa jýyq adam qutqarylyp, bir bóligi evakýatsııalandy. Onyń 45 myńy — bala. Keıingi 80 jylda bolmaǵan topan sý bir mezgilde 10 óńirdi qamtydy. Biraq, soǵan qaramastan, bizdiń qutqarýshylar eń aldymen múmkindigi shekteýli, egde jastaǵy adamdardy qutqaryp, qandaı qıyn jaǵdaı bolsa da kún demeı, tún demeı osy jumystyń bárin atqardy», — dedi ol.

Aıtýynsha, tasqynnan qutqarylǵan halyqtyń basym bóligi qazir úıine qaıtqan.

«Qazirgi tańda evakýatsııalyq pýnkterde 6,5 myńnan adam bar. Onyń 3 myńǵa jýyǵy — bala. Evakýatsııa bastalǵannan beri 40 myńǵa jýyq adam óz úılerine aman-esen qaıtty. Jańa aıtqan 6,5 myńnan astam adam da jýyqta úıine oralady degen senimdemin. Olarǵa búkil qamqorlyq jasalyp jatyr. Bizdiń eriktiler men kásipkerler tarapynan, memleket tarapynan barlyq kómek kórsetilip jatyr», — dedi Shyńǵys Árinov.