Tasqynnan kelgen zalaldy baǵalaý jumysy keshigip jatyr, jedeldetý kerek — Oljas Bektenov

<p>ASTANA. KAZINFORM — Qazaqstan Premer-Mınıstri Oljas Bektenov Memleket basshysy Qasym-Jomart Toqaevtyń sý tasqyny saldaryn joıý jáne qalpyna keltirý jumystarynyń barysy jónindegi tapsyrmalaryn oryndaýǵa qatysty keńes ótkizdi. Jetekshilik etetin baǵyttar boıynsha zardap shekken óńirlerdiń ákimderi men mınıstrlerdiń baıandamasy tyńdaldy.</p>

Elimiz sý tasqynynyń qaýipti kezeńinen ótti. Qazirgi sátte Atyraý oblysynda Jaıyq ózenindegi sýdyń qaýipti deńgeıiniń saqtalýyna baılanysty sý tasqynyna qarsy jumystar jalǵasyp jatyr.

Osyǵan baılanysty Atyraý oblysynyń ákimi Serik Shápkenov sý tasqynyna qarsy is-sharalardy iske asyrý jalǵasyp jatqan óńirdegi ahýal týraly baıandady.

Jaǵalaýdy nyǵaıtý bógetteriniń boıynda (uzyndyǵy 520 km-den astam) táýlik boıy kezekshilik uıymdastyryldy. 

Bul rette Atyraý oblysynyń sý tasqyny jaǵdaıy turaqty aýdandarynda zardaptardy joıý jónindegi komıssııalar belsendi jumys isteýde.

Máselen, Jylyoı aýdanynda 3 730 ótinish berýshi turǵynǵa jalpy somasy 1,3 mlrd teńgege 100 AEK mólsherinde birjolǵy járdemaqy tólendi.

Komıssııa 2 727 ótinishti qabyldap, 2 671 úıge tehnıkalyq tekserý jáne 2 624 úıge baǵalaý júrgizgen. 10 turǵyn úıdiń qurylysy bastalyp, 14 turǵyn jóndeý-qalpyna keltirý jumystaryna tólem aldy. Baǵalaýshy mamandar táýlik boıy jumys istep jatyr. 

Jalpy, Qazaqstannyń sý tasqynynan zardap shekken óńirlerinde 60 myńnan astam adam óz úılerine oraldy. Evakýatsııalyq pýnktterdegi turǵyndarǵa jergilikti atqarýshy organdar qajetti kómek kórsetýde.

Foto: QR Úkimeti

26 651 otbasy 10 mlrd teńgeden astam somaǵa 100 AEK mólsherinde birjolǵy tólem aldy.

Jergilikti ákimdikter zardap shekken turǵyndardy sapaly turǵyn úımen qamtamasyz etý boıynsha jumys júrgizip keledi. 239 otbasy qıraǵan baspanasynyń ornyna páterler men úılerge ıe boldy.

Aqtóbe, Batys Qazaqstan, Qostanaı, Atyraý, Soltústik Qazaqstan, Pavlodar oblystarynda zardap shekken azamattarǵa arnalǵan 794 jańa úıdiń qurylysy júrgizilýde.

Sonymen qatar 891 otbasy turǵyn úıin jóndeýge jáne qalpyna keltirý úshin ótemaqy aldy. Jalpy zardap shekken óńirlerde 11 137 turǵyn úı tekserilip, 7 863 nysanǵa baǵalaý jumysy jasaldy. 

Aıta ketý kerek, sýǵa ketken maldyń ótemi úshin memlekettik kómek kólemi 1,3 mlrd teńgeden asty.

Úkimet basshysy jumys qarqynyna basa nazar aýdardy. 

«Baǵalaý, zalaldy óteý, qalpyna keltirý jáne qurylys júrgizý úshin aýqymdy jumys kútip tur. Biz qazirgi kezeńde jumys qarqynyn kórip otyrmyz, biraq keltirilgen zalaldy baǵalaý satysynda keshigý bar. Tótenshe jaǵdaıda barlyq protsesterdi jedeldetý kerek. Baǵalaýshy mamandardy shyǵyndy esepteý aıaqtalǵan óńirlerden Atyraý jáne basqa da oblystarǵa jedel baǵyttaý qajet», — dep atap kórsetken Oljas Bektenov barynsha qysqa merzimde baǵalaýdy sapaly júrgizýdi tapsyrdy.

Jergilikti ákimdikterge kelgen mamandarǵa kómek kórsetýdi júktedi.