Tasqynnan qaýipsiz jerge kóshirilgender sany 100 myńǵa jaqyndady

<p>ASTANA. KAZINFORM &ndash; Tótenshe jaǵdaılar mınıstrligi Azamattyq qorǵanys jáne áskerı bólimder komıtetiniń aǵa ofıtseri Erasyl Saıpash tasqynmen kúreske tartylǵan áýe kemeleriniń sany 17-ge jetkenin aıtty.</p>

«Sý tasqyny bastalǵaly beri Azamattyq qorǵanys qyzmetteri 99 869 adamdy, onyń ishinde 36 591 balany qaýipsiz jerlerge jetkidi. Ýaqytsha ornalasý pýnktterine 6 586 adam, onyń ishinde 3 197 bala ornalasty. 9 mln tekshe metr erigen qar sýy soryp shyǵaryldy, 1,6 mln qapshyq jáne 1,2 mln tonna ınertti materıal tóseldi. Búgingi tańda avarııalyq-qutqarý jumystarynda 34 272 adam, 4 myń tehnıka, 17 áýe kemesi jumyldyryldy», - dedi ol Ortalyq kommýnıkatsııalar qyzmetinde ótken brıfıngide.

Onyń sózinshe, Atyraý, Aqtóbe, Aqmola, Qostanaı, Shyǵys Qazaqstan, Soltústik Qazaqstan oblystarynda 3 563 jer úı, 563 aýla men 1 778 saıajaı úıi sý astynda qalyp otyr. 3 052 úı men 1 935 aýladan sý burylǵan.

«Elimizdiń Aqtóbe, Qostanaı, Batys Qazaqstan, Aqmola, Qaraǵandy, Atyraý, Soltústik Qazaqstan jáne Ulytaý oblystarynda jergilikti aýqymdaǵy 34 tótenshe jaǵdaı rejımi áreket etedi. Mınıstrlik azamattardy asa muqııat bolýǵa, sý tasqyny kezeńinde qaýipsizdik sharalaryn múltiksiz saqtaýǵa, úılerden jáne evakýatsııalaý pýnktterinen tıisti ruqsatsyz ketpeýge shaqyrady», - dedi ol.