Tasqynǵa daıyndyq: Atyraýdyń Inder aýdanynda 20 tonna azyq-túlik qory jasaqtaldy

<p>ATYRAÝ. KAZINFORM — Atyraý oblysynyń Inder jáne Mahambet aýdanynda Jaıyq ózeniniń deńgeıi qaýipti shekten asyp ketti. Osyǵan baılanysty Inder aýdanynda 20 tonnadan astam azyq-túlik qory jasaqtaldy.</p>

Inder aýdany boıynsha gýmanıtarlyq kómekti úılestirýshi Altynbek Maratulynyń aıtýynsha, azyq-túlik qory Atyraý qalasynan jetkizilgen. 

«Jaıyq ózenindegi sý deńgeıiniń kóterilýine jasaqtalǵan azyq-túlik qory turǵyndardyń qajettiligi úshin qoldanylatyn bolady. Qazir aýdan ortalyǵy — Inderbor kentine 20 tonnadan astam azyq-túlik qory jetkizildi. Onyń ishinde birinshi kezekte tutynýǵa qajetti un, makaron, sút, kúnbaǵys maıy, kókónister jáne gıgıenalyq zattar bar», -dedi Altynbek Maratuly.

Eske sala ketelik, budan buryn Jaıyq ózeniniń sýy Inder aýdanynda qaýipti deńgeıden asyp ketkenin jazǵan edik. 

Sondaı-aq, Inder aýdanynda 25 myń maldy qaýipsiz aýmaqqa shyǵarý josparlanyp otyr.