Tasqynda baspanasyna sý kirgen aqtóbelikter úıine oralyp jatyr
Aqtóbe qalasynyń Almaty jáne Astana aýdandarynda sý kirgen úıler sany ártúrli. Qazir Astana aýdany boıynsha tehnıkalyq tekserý men baǵalaý jumysy aıaqtaldy.
«Astana aýdany boıynsha 41 ótinish qabyldandy. Bárine tehnıkalyq zertteý júrgizilip, baǵalaý qorytyndysy shyǵaryldy. Qazirgi kezde materıaldyq kómek suraǵan 30 úı ıesine aqsha aýdardyq. Ózgesine de aýdarylady. Biriniń úıiniń kireberisine sý kirse, ekinshisinde túgel jaılaǵan. Sáıkesinshe shyǵyndy óteý aqysy da ártúrli. Sonymen birge olar bir jolǵy kómek berildi», - dedi Astana aýdany ákiminiń orynbasary Jaqsat Tólegenov.
Aqtóbe qalasy Astana aýdany boıynsha qulaǵan, apatty úı joq. Qazir 5 otbasy evakýatsııalyq pýnktte jatyr, ózgesi úıine oraldy. Al úıine oralǵandar qurylys qamyna kirisken.
«2021 jyly salyp alyp, 2022 jyldan beri turyp jatyrmyz. 2023 jyly sýǵa kirip, jóndep aldym. Bıyl 27-28 naýryz, 2-sáýirde sý kirdi. Birjolǵa tólem aldym, materıaldyq ótemaqy aldym. Qazir tsement, aǵashty alyp, qurylysty bastaımyz. Bizge 15 kúnde barlyq shyǵyn tólendi. Bul úıde barlyǵy 10 adam turamyz. 7 balam bar. Úıge jóndeý jasaımyn. Oǵan deıin balalar jataqhanada turady», - dedi qala turǵyny Syrym Bekembaev.
Aqtóbe qalasy Almaty aýdany boıynsha 3 myńǵa jýyq adam baspanasyna sý kirgenin aıtyp, ótinish jazǵan. Qazir munda birneshe tehnıkalyq tekserýshi jumys istep júr.
«Úıdiń neden salynǵanyn, qurylys materıaldarynyń qandaı kúıde ekenin tekseremiz. Іrgetasynan bastap, shatyryna deıin qaraımyz. Árleý jumystary da nazardan tys qalmaıdy. Sonymen birge eden jabyndysyn da tekseremiz. Biz qujatymyzdy baǵalaýshy kompanııaǵa beremiz. Olar shyǵyn kólemin esepteıdi», - dedi tehnıkalyq baǵalaýshy Erǵasyr Segizbaev.
Almaty aýdany turǵyndary úshin aldyn ala keste belgilenip, tehnıkalyq tekserýshilerdiń barar kúni habarlandy. Sol kezde adamdar úıin ashyp, kórsetedi. Qazirgi kezde kópshiligi esik, terezesin ashyp, syz basqan úılerin keptirip jatyr.
«2017 jyly sý kóterilgenimen, úıime kirmedi. Bıyl 28 naýryz kúni sý kelip, eriktiler qum toly qap tósedi. Keıin 29 naýryz kúni qar jaýyp, sý ketti. Keıin kún jylyp, qaıta keldi. Biz birinshi qabattaǵy tehnıkanyń bárin ekinshi qabatqa kóterdik. Bir apta boıy úıdi jaǵalaı qum toly qap tósegenimizben, sý kirip ketip tur. Esikke qurylys kóbigin de quıdyq, biraq nátıje bolmady. Sebebi aǵys qatty boldy», - dedi qala turǵyny Sáýlet Qaıyńbaeva.
Ol endi edenin qaıda tsement quıyp, jıhazdy, esikti aýystyrýdy josparlap otyr. Qazir úı ishin keptirip jatyr. Aqtóbe oblysy boıynsha sý basqan aýdandarda tehnıkalyq tekserý men baǵalaýshylar jumys istep jatyr.