Tasqyn sýdan halyq qalaı qutqaryldy — Mamandar telemarafonda suhbat berdi

<p>ASTANA. KAZINFORM — Sý tasqynyndaǵy el birligine arnalǵan «Biz birgemiz» telemarafony Jibek Joly arnasynda jalǵasyp jatyr. Onda tasqyn bastalǵanda kómekke birinshi bolyp jetken qutqarýshylar men tártip saqshylary suhbat berýde.</p>

Aıtyp kelmegen apatta el-jurttyń aman qalýyna asyqqan azamattar qutqarý jumystaryna belsene kiristi. Apatpen alǵashqylardyń biri bolyp arpalysqan erler men eriktiler jeterlik. Sonyń biri Aqmola oblysy Astrahan aýdandyq TJ bóliminiń bastyǵy Aıat Seralıev 32 adamdy qutqaryp qalǵan. Onyń ishinde múmkindigi shekteýli jandar da bar.

«Qutqarýshylar jasaǵy tasqyn bastalǵaly kúndiz-túni qyzmette júr. Qaýip aıaq astynda turǵanda oılanýǵa ýaqyt joq. Staryı Kolýton aýylynda bizdiń jasaq úı-úıdi aralap, qalyp ketken turǵyndardy izdep júrgen. Men kirgen úıde naýqas adamnyń daýysy estildi. Áriptesterimdi shaqyrýǵa ýaqyt bolmady. Biraq meniń turǵyndy alyp shyqqanymdy kórgen soń ózgeleri de kelip kómektesti», — deıdi A. Seralıev arna tilshisine bergen suhbatynda. 

Aǵyn sýdy quryqtaý úshin qutqarýshylarmen qatar tártip saqshylary da kúsh saldy. Petropavldyq tártip saqshylary eki adamdy ajaldan arashalap qaldy. Oqıǵa Petropavl qalasynyń shetindegi «Bylǵary zaýyty» aýdanynda bolǵan. Esil ózeni arnasynan asyp, aınalaǵa jaıylǵan kezde muzdaı sýǵa qulap, jaǵaǵa jete almaı jatqan aǵaıyndy ekeýdi polıtsııa baıqap, jol talǵamaıtyn kólikpen dereý jetken. 

«Sýdyń aǵysy qatty boldy. Oqıǵa ornyna jetkende bir adam tipti qulap, sýǵa tunshyǵyp jatty. Esh oılanbastan muzdaı sýǵa sekirip, olardy syrtqa alyp shyqtyq», — dedi SQO qalalyq polıtsııa basqarmasynyń bastyǵy Marat Jumalıev.

Sonymen birge, Ulttyq ulannyń 3 myńnan astam sarbazy Tótenshe jaǵdaılar mınıstrligimen birge apattyń aldyn alý jumystarynyń bel ortasynda júr. Qazir de ádettegi áskerı ómirdi ýaqytsha qutqarýshynyń qyzmetine aýystyrǵan Ulttyq ulan jaýyngerleri aımaqtaǵy aǵaıynnyń amandyǵy úshin eńbek etip jatyr. Batystaǵy arnasynan asqan Jaıyqtyń jaǵasyn nyǵaıtý, soltústiktiń sý basqan aýyldaryndaǵy aǵaıyndy qaýipsiz jerge kóshirý, bóget kóterý, sýdyń baǵytyn burý syndy sharalardyń barlyǵynda ulandyqtardyń úlesi zor. Tipti, topan sýdyń ortasynda júrgen birneshe kýrsantqa Memleket basshysynyń atynan syılyq tabystaldy.

Al qostanaılyq Nurhan Qabyken sý tasqyny bastalǵaly beri oblysta qurylǵan jedel shtabta qyzmet etýde. Qutqarýshynyń jaqyndaryn kórmegenine bir aıǵa jýyqtady. Olar munda sýdyń aǵysyn burýmen aınalysyp jatyr. Jalpy Qostanaıdaǵy tasqynynan 672 úıdi sý basyp, 9 226 turǵyn evakýatsııalanǵan. Shyǵyn budan da kóp bolýy múmkin edi, alaıda sýdyń qarqynyn toqtatý jumystary barynsha kúsheıtildi. Nurhan men áriptesteriniń tabandylyǵynyń arqasynda Qostanaı men Tobyldy baılanystyryp turǵan ortalyq kópirdi tasqyn buza almady. Bul jumysqa qutqarýshylarmen qatar turǵyndar da, eriktiler de kómektesken. 

«Bul jerde júrgenderdiń bári bir aıdan beri otbasyn kórgen joq. Bizdiń jumys osyndaı. Bar nazar qyzmette bolýy kerek», — deıdi ınjener Nurhan Qabyken.

Aıta keteıik, búgin 10 respýblıkalyq arnanyń tikeleı efırinde jalpyulttyq telemarafon ótip jatyr. 

Jibek Joly, Qazaqstan, «Habar», «Eýrazııa», «KTK», «31 arna», Atameken Business, Astana TV, «7 arna» jáne Almaty TV telearnalarynyń 5 saǵattyq tikeleı efırinde tasqyn basqan aýmaqty kózben kórgen, tabıǵı apattan zardap shekken turǵyndardyń jan tebirenter oqıǵalary aıtylyp, tabıǵı apat aımaqtarynan reportajdar beriledi.