Tasqyn sýdan Atyraý qalasy men 4 aýdannyń sharýa qojalyqtary zardap shekken
Atyraý oblystyq aýyl sharýashylyǵy basqarmasy bólim basshysynyń mindetin atqarýshy Azat Qapanovtyń aıtýynsha, sý tasqynynan zardap shekken aýdandarda sharýa qojalyqtaryna ótemaqy tóleý boıynsha komıssııa qurylyp jatyr.
«Bıyl Atyraý oblysynda 10 825 gektar alqapqa egin egý josparlandy. Tasqynnyń saldarynan egin egilgen 85 gektar alqap sý astynda qalyp otyr. Kóktemgi dala jumysyn júrgizýge arnaıy daıyndalǵan jerdiń 4 myń gektardy sý basty. Aýyl sharýashylyǵy mınıstrliginiń tasqyn sýdan zardap shekken óńirlerge ótemaqy tóleý jónindegi qaǵıdasyna sáıkes aýdandarda arnaıy komıssııalardy qurý qolǵa alyndy. Bul komıssııalar sý tasqynynan zardap shekken aýyl sharýashylyǵy qurylymdarynyń jetekshilerinen ótinishterdi qabyldaıdy. Sharýashylyqtardyń shyǵyny óteletin bolady», - dedi Azat Qapanov.
Onyń aıtýynsha, Atyraý qalasy aýmaǵynda sý tasqynynan alma baǵy, egistik alqaby bar sharýashylyqtar zardap shekken.
«Tasqyn sýdan Qyzylqoǵa, Jylyoı, Mahambet, Inder aýdandarynda jáne Atyraý qalasyndaǵy sharýa qojalyqtarynyń birqatary zardap shekti. Qazir oblys aýmaǵynda 500 gektardan astam egin alqaby sý basý qaýpi bar aýmaqta tur. Bul aýmaqtar qorshalyp, bóget ornatylǵan. Máselen, Mahambet aýdanyndaǵy osyndaı aýmaqta egin sharýashylyǵymen aınalysatyn 7, mal ósiretin 19 sharýa qojalyǵy bar», - dep málim etti Azat Qapanov.
Eske sala ketelik, budan buryn Atyraý oblysynyń Mahambet aýdanynda 66 egin alqaby tasqyn sý astynda qalǵanyn habarlaǵan edik.