Tasqyn sý Atyraý mańyndaǵy Saryózek kanalyn jyryp ketken
Bul týraly áleýmettik jelide vıdeo tarady.
Atyraý qalasynyń ákimi Shákir Keıkınniń aıtýynsha, Saryózek eldi mekenindegi sharýa qojalyǵynyń ıeleri de habar bergen.
«Saryózek kanaly boıyndaǵy bógettiń úsh metrdeı aýmaǵyn sý jyryp ketkeni anyqtaldy. Soǵan baılanysty qalalyq ákimdigi men «Arnaýly avtobaza» JShS-dan 15 adam kanaldyń sý jyrǵan bóligin qalpyna keltirý jumysyn júrgizdi. Bógetti nyǵaıtý úshin qum toltyrylǵan 1 tonnalyq 60 jáne 50 kelilik 100 qapshyq tóseldi. Bul jumys 2 saǵatta aıaqtaldy. Osyndaı qaýiptiń aldyn alý úshin arnaıy top táýlik boıyna kezekshilik atqarady», - dep habarlady Shákir Keıkın.
Mahambet aýdanynyń aýmaǵynan bastaý alatyn kanaldyń uzyndyǵy – 60 shaqyrym. Sý aransy Atyraý qalasy jáne Erkinqala aýyldyq okrýginiń aýmaǵymen ótedi.
Eske sala ketelik, buǵan deıin Atyraý - Oral trassasynan Inderborǵa burylatyn 7 shaqyrym joldy tasqyn sý shaıyp ketkenin jazǵan edik.
Sondaı-aq, Jaıyq ózeninen Atyraý mańyndaǵy 5 eldi mekenge qaýip tónýi múmkin ekenin habarladyq.