Tasqyn aımaqtarynda 17,5 myń adam úıine qaıtyp oraldy

<p>ASTANA. KAZINFORM &ndash; Tótenshe jaǵdaılar mınıstrligi Azamattyq qorǵanys jáne áskerı bólimder komıtetiniń aǵa ofıtseri Erasyl Saıpash eldegi tasqynmen kúres jumystary qalaı júrip jatqanyn aıtty.</p>

«Osy saǵatta 17 547 adam óz úıine oraldy. 6 932 adam, onyń ishinde 3 111 bala evakýatsııalaý pýnktterin panalap júr. Sý tasqyny bastalǵannan beri 117 142 adam, onyń ishinde 40 833 bala qutqarylyp, evakýatsııalandy. 113 852 mal qaýipsiz jerge aıdaldy», - dedi TJM ókili.

Onyń málimeti boıynsha, tasqynmen kúres kezinde 3 873 úı men 2 502 aýladan sý basqa jaqqa burylǵan.

«9,8 mln tekshe metrden astam qar sýy soryp shyǵaryldy, 3 mln astam qumqap, 1,4 mln tonnadan astam ınertti materıal tóseldi. Aqmola, Aqtóbe, Qostanaı, Atyraý, Soltústik Qazaqstan oblystarynda 5 677 jeke úı, 1 326 aýla aýmaǵy sý astynda qalyp otyr», - dedi Erasyl Saıpash.