Tashkentten Almaty men Astanaǵa ushatyn áýe reısteri kóbeıdi

ASTANA. QazAqparat - Budan bylaı Tashkentten aptasyna Almatyǵa 10 ret, Astanaǵa 7 ret ushýǵa bolady. Bul týraly Qazaqstan Respýblıkasy men Ózbekstan Respýblıkasy arasyndaǵy ekijaqty yntymaqtastyq jónindegi úkimetaralyq komıssııanyń 17 otyrysy kezinde QR Investıtsııalar jáne damý mınıstir Jeńis Qasymbek aıtty, dep habarlaıdy «QazAqparat» HAA tilshisi.

«Byltyr biz Astana men Tashkenttiń ortasynda aptasyna 4 reıs, Almaty men Tashkenttiń arasynda 7 reıs bolatyndaı (avıareıs) ózbek tarapymen keliskenbiz. Endi osy kelisimde aptasyna Almaty men Tashkenttiń arasynda 10 reıs, Astana men Tashkenttiń ortasynda 7 reıs bolatyn boldy», - dedi mınıstr.

Jeńis Qasymbektiń aıtýynsha, poıyz tasymaly boıynsha da eki el kelisimge kelgen.

«Poıyz boıynsha aıtarym. Aptasyna buryn Almaty - Tashkent arasynda poıyz eki ret júrip turatyn. Osydan bylaı eki aralyqta úsh ret qatynaıtyn boldy. Turaqty avtobýs budan bylaı tek Tashkent pen Shymkent arasynda emes, Tashkentten Astana men Almatyǵa da shyǵatyndaı kelisip otyrmyz», - dedi Jeńis Qasymbek.

Aıta ketsek, eki eldiń úkimetaralyq komıssııasynyń 17 otyrysynda búgin QR Premer-Mınıstriniń birinshi orynbasary Asqar Mamın men Ózbekstan tarapynan ÓR Premer-Mınıstriniń birinshi orynbasary Achılbaı Ramatov eki eldiń arasyndaǵy ekijaqty yntymaqtastyq jónindegi birlesken Úkimetaralyq komıssııasynyń 17 otyrysynyń hattamasyna qol qoıdy.