Tashkentte «Jibek jolynyń injý-marjany» halyqaralyq kınofestıvali ótedi
Ózbekstan Respýblıkasy Prezıdenti Shavkat Mırzıeevtyń bastamasymen qaıta jańǵyrǵan kınofestıvaldiń ashylý saltanatyna 37 elden 400-ge jýyq sheteldik kınorejısser men 55 tanymal kıno juldyzdary qatysady. Ózbekstan kınematografııa agenttiginiń uıymdastyrýymen ótetin osy sharaǵa Ázerbaıjan, Belarýs, Egıpet, Izraıl, AQSh, Úndistan, Italııa, Iran, Qazaqstan, Qyrǵyzstan, Polsha, Reseı, Tájikstan men Túrkııadan kıno óneriniń tanymal ókilderi qatysady.
Halyqaralyq kınofestıval sheńberindegi «Álemdik kıno kúnderi» kezinde 14 eldiń - Ázerbaıjan, Belarýs, Egıpet, Izraıl, Úndistan, Italııa, Iran, Qazaqstan, Qyrǵyzstan, Polsha, Reseı, Tájikstan, Túrkııa men Ózbekstannyń kıno kúnderi ótedi.
Tashkent halyqaralyq kınofestıvalinde qazaqstandyq kınogerler de óz fılmderin usynady. Festıvalǵa Qazaqstannan Nurjuman Yqtymbaev, Jannat Qýanysheva, Satybaldy Tekeev, Arýjan Jazylbekova, Azamat Satybaldy, Dilshat Rahmatýllın, Samal Eslıamova, Almaz Maldybaev, Adaı Ábildınov, Aıbıke Raqymjanova, Dıana Tursyndardyń kelýi kútilýde.
Festıval aıasynda qazaqstandyq kınogerler túsirgen «Muzbalaq», «Kúltegin», «Ámre», «Bir sen úshin», «Amanat» fılmderi kórsetiledi. Olardyń qatarynda Aqan Sataevtyń «Anaǵa aparar jol» fılmi bar.
«Álemdik kıno kúnderinde» ár eldiń ókilderi óz fılmderin tek el astanasynda ǵana emes, Ózbekstannyń túrli qalalarynda da usynady.
Qazaqstannyń kınotýyndylary - Erlan Nurmuhambetovtyń «Jylqy urylary» fılmi 1 qazanda Ándijan oblysynda, Sábıt Qurmanbekovtiń «Oralman» fılmi 2 qazanda Ferǵanada kórsetiledi.
Qazaqstandyq delegatsııa músheleri festıvaldiń sońǵy kúni qonaqtar Tashkentke oralyp, «Renessans Holl» kınokontsert zalynda Tashkent Halyqaralyq kınofestıvaliniń jabylý saltanatyna qatysady.
Aıta ketý kerek, Tashkentte 1968-1997 jyldar aralyǵynda Azııa, Afrıka jáne Latyn Amerıkasy elderiniń halyqaralyq kınofestıvali ótkizilip kelgen.