Tashkentte úsh eldiń mınıstrleri kúz ben qys mezgilderindegi sý-energetıkalyq júıeleriniń jumysyn kelisti

<p>TAShKENT. KAZINFORM &ndash; Qazaqstan, Ózbekstan, Qyrǵyzstannyń energetıka mınıstrleri Tashkentte kezdesip, kúzgi jáne qysqy kezeńderdegi sý-energetıkalyq júıeleriniń jumysyn talqylady, dep habarlaıdy Kazinform agenttiginiń Tashkenttegi menshikti tilshisi Álıhan Asqar.</p>

Jaýapty vedomstvo basshylarynyń kezekti kezdesýine Qazaqstan tarapynan Energetıka mınıstri Almasadam Sátqalıev, Sý resýrstary jáne ırrıgatsııa mınıstri Nurjan Nurjigitov qatysty.

Ózbekstannyń Energetıka mınıstrliginen málim etkendeı, kezdesýde kúzgi jáne qysqy kezeńderde elderdiń sý-energetıkalyq júıeleriniń turaqty qyzmetin qamtamasyz etý máselesi qaralyp, jumys kestesi bekitildi.

Foto: Ózbekstannyń Energetıka mınıstrligi

Munymen birge taraptar «Qambarata - 1» gıdroelektrostantsııanyń qurylys barysyn da sóz etti. Bul rette sý jáne energetıkalyq júıelerdiń teńgerimin saqtaýǵa basa mán berildi.

Sondaı-aq, kezdesýde mınıstrler Qyrǵyzstannyń Jalal-Abad oblysyndaǵy Chatkal ózeninde salynýy múmkin sý elektr stantsııasynyń jobasyn qarady. Buǵan deıin atalǵan aımaqta qytaılyq «CEEC» kompanııasynyń mamandary aldyn ala zertteý júrgizgen bolatyn.

Kezdesý sońynda taraptar jumys toptarynyń turaqty otyrysyn uıymdastyrý jáne jobalardy iske asyrý úshin «Jol kartasyn» qabyldaýǵa ýaǵdalasyp, birqatar qujatqa qol qoıdy.