Tashkentte Tóle bı kesenesiniń salynýyn maqtan tutamyz - Shavkat Mırzıeev
«Jaqynda arnaıy qaýly qabyldandy. Oǵan sáıkes, qazaq xalqynyń uly aqyny, oıshyl ári gýmanıst Abaı Qunanbaevtyń murasy tereń zerttelip, keńinen nasıxattalýy tıis», - dedi Ózbekstan prezıdenti Shavkat Mırzıeev Qazaqstandaǵy Ózbekstan jylynyń ashylý saltanatynda.
Óz sózinde Sh.Mırzıeev eki eldiń baýyrlas baılanystaryn tilge tıek etip, Tashkent qalasyndaǵy Tóle bıdiń kesenesin de eske aldy.
«Biz Tóle bı kesenesiniń Tashkent qalasynda salynǵanyn maqtan tutamyz. Ol jerge ózbekter de, baýyrlas qazaqtar da baryp, táý etedi. Áli esimde, Siz, qurmetti Nursultan Ábishuly, Ózbekstanǵa memlekettik saparmen kelgende biz birge sol qasıetti jerge baryp, eki eldiń xalqyn tatýlyq men beıbitshilikte ómir súrýge úndegen uly tulǵany eske aldyq. Men oılaımyn, ata-babalarymyz bizdiń qazirgi dostyǵymyzdy, shynaıy ári ashyq baılanystarymyzdy kórgende qýanatyn edi. Bárimizge - qazaqtarǵa, qyrǵyzdarǵa, túrkimenderge, tájikter men ózbekterge, jalpy, Ortalyq Azııada turatyn ult pen ulystarǵa tatýlyqta ómir súrýdi jazǵan eken. Bul - taǵdyrdyń jazýy. Soǵan bar kúsh-jigerimizdi salyp, ortaq úıimizdi qorǵaýymyz qajet», - dep atap kórsetti Sh.Mırzıeev.
Aıta keteıik, salatanatty shara barysynda N.Nazarbaev Ózbekstan prezıdentin «Dostyq» ordenimen marapattady. Aldaǵy ýaqytta Astanada Álisher Naýaıdiń eskertkishi ornatylady.