Tashkentte ShYU sammıtinde 400-ge jýyq jýrnalıst jumys isteıdi

ASTANA. QazAqparat - 23-24 maýsymda Tashkentte Shanhaı Yntymaqtastyq Uıymy sammıtinde jumys isteý úshin 400-ge jýyq jergilikti jáne sheteldik jýrnalıster akkredıtteldi, dep habarlady sammıt baspasóz ortalyǵyna silteme jasap RIA Novostı.

«ShYU sammıtin jarııalaýǵa Qytaı, Reseı, Qazaqstan, Qyrǵyzstan, Tájikstan, Túrkimenstan, Aýǵanstan, Úndistan, Pákistan, Belarýs, Iran, Mońǵolııa jáne basqa da memleketterden buqaralyq aqparart quraldarynyń 200-ge jýyq ókili, sondaı-aq Ózbekstannyń 200-deı jýrnalısti qatysady», - dep habarlady baspasóz ortalyǵy.

Baspasóz ortalyǵy «Ózbekekspoortalyq» kórme pavılondarynyń birinde myńdaǵan sharshy metrge jýyq alańdy alady. Ol sammıt sharalarymen tikeleı habardy engizý úshin teledıdar ekrandary ornatylǵan birneshe modýlderden turady, sondaı-aq symsyz ınternetke qoljetimdilikpen qamtamasyz etiledi.

Budan buryn Ózbekstan Ulttyq teleradıokompanııasy onlaın rejiminde ShYU sammıtin jarııalaý úshin arnaıy habar taratatyn telearnany iske qosatynyn habarlaǵan.

ShYU-ǵa Reseı, Qytaı, Qazaqstan, Qyrǵyzstan, Tájikstan, Ózbekstan elderi kiredi. Baqylaýshy mártebesi Belarýs, Mońǵolııa, Úndistan, Iran, Pákistan, Aýǵanstanda bar. 2015 jyly ShYU-ǵa Úndistan men Pákistandy qabyldaý rásimi bastaldy. Ýfada ShYU sammıtinde uıymǵa tóraǵalyq Reseıden Ózbekstanǵa ótken.